姬蒂班查爆粗「3P」慶封后

金像女星姬蒂班查（Cate Blanchett）周日登上奧斯卡影后寶座後仍未可休息，回家瞓得數小時又要趕上名嘴艾倫迪珍妮絲（Ellen DeGeneres）的清談節目，難怪她一出場即扮「軟腳蟹」，行路拐下拐下要艾倫上前攙扶，但一行近埋位又隨着音樂跳舞，認真生鬼！受訪期間，姬蒂自爆獲獎後興奮得整晚與小金人難捨難離，索性大被同眠，大灑鹽花表示：「尋晚係我同老公第一次最似玩3P嘅經驗！」即令全場笑爆嘴。其後她又對艾倫說：「尋晚返屋企時，我要停車去買嘢食醫肚。因為你喺頒獎禮派Pizza時，我喺外面酒吧搵緊嘢食，工作人員唔畀我入嚟！不過我見好多女星搶住要Pizza，就算喺現場都可能分唔到。」

10年最高收視

此外，姬蒂周日封后後出席現場直播的記者會，一名來自家鄉澳洲的記者大讚其得獎致詞精彩，但她卻回應：「我已經唔記得咗講過啲咩，不過多謝！」記者其後提到她是首位澳洲演員共贏得兩次奧斯卡演技獎時，姬蒂即爆粗笑說：「呢樣你就唔X好唔記得啦！」另外，雖然當晚擔任主持的艾倫獲得的評價好壞參半，但她卻為頒獎禮創下10年來最高收視，共有4,300萬名觀眾收看。

慶功派對失色

至於奧斯卡慶功派對方面，未知雜誌《Vanity Fair》所舉辦的派對是否遭早前結怨的桂莉芙白德露（Gwyneth Paltrow）成功杯葛，今年不少紅星如珊迪娜布洛（Sandra Bullock）等均未有出席。另外，有指真人騷女星Kim Kardashian，當晚遭嫌棄非一線巨星而被拒諸門外，但她否認傳聞，而鄉謠小天后Taylor Swift亦有盛裝出席派對。

文：外娛組