王家衛讚奧斯卡規模大
【林淑汶洛杉磯直擊】導演王家衛執導電影《一代宗師》雖然失落奧斯卡最佳服裝和最佳攝影，但他沒有失望。王家衛說：「冇所謂，因為好難o架，好似《Gravity》（引力邊緣）咁，佢哋有幾千人拍套戲，同埋佢哋又有工會，每一個人都有關係，但我覺得能夠提名已經唔容易。」
前晚十時半，王家衛現身當地機場乘機返港，預備出席香港電影導演會周年晚宴。問他覺得奧斯卡氣氛如何？他說：「佢哋個組織好嚴，製作好好，好團結。（香港金像獎有冇嘢學習？）奧斯卡係一個好大型嘅騷，全球十幾億人睇，佢哋有好多資源同規模好大，但金像獎已經做得好好。」他又透露之前與鞏俐見面，問會否再合作？他笑說：「梗有機會。」