陳偉霆示威 買樓贈阿Sa
陳偉霆與女友蔡卓妍（阿Sa）拍拖逾3年依然打得火熱，早前孖住出埠享受陽光與海灘，一直視阿Sa為終身伴侶的他，聞舊愛Angelababy獲男友黃曉明送230萬名車及傳已秘婚時，即時揚言會買豪宅贈阿Sa，似向舊愛示威。
日前Angelababy生日獲男友黃曉明送贈230萬林寶堅尼，曾與Baby拍拖4年的陳偉霆現與女友阿Sa亦愛得癡纏，視阿Sa為「老婆」的他近年轉戰內地拍劇吸人仔，並已儲下充足彈藥，隨時給阿Sa一個安樂窩。
唔介意食魚蛋粉
昨日陳偉霆西裝骨骨出席活動，記者問到會否送樓給阿Sa時，他不禁露口風說：「我可以，最緊要相處開心，若果佢想要，我盡量可以滿足佢。（冧死人？）唔係，都要睇另一半真心需求係乜嘢。」問到會否高調送給阿Sa驚喜？他似有弦外之音說：「我同佢（阿Sa）偏向簡單，食魚蛋粉都OK。」
對於Baby獲曉明送車，更在鏡頭前肉緊擁抱及十指緊扣晒恩愛，陳偉霆大方承認有看過報道，亦在朋友微博見到有關相片，問到會否覺得很冧？他說：「開心最緊要，見到佢都好開心。（有冇短訊祝佢生日快樂？）冇，好少聯絡。」
甚少提及前女友
對於外界指曉明送禮太高調，陳偉霆即不欲多談：「每個人戀愛方式同生活唔同，最緊要開心同幸福。（傳Baby有BB？）傳啫，唔係幾信，大家都咁年輕，Baby好專注工作。」陳偉霆又表示甚少在女友面前提起舊愛：「我哋冇乜提，每個人都有之前嘅一半同故事，真心祝福佢（Baby）。」據知曉明除了送辣跑，原來Baby現時入住的數千萬貝沙灣豪宅亦是由曉明所送。
而身在外地工作的阿Sa問到若男友送樓會否太驚喜？她說：「佢送咩畀我都驚喜，只要係佢送就得，最緊要有心。」兩人認真愛得癡纏。
文：音樂組