徐小鳳個唱添食 減票價益街坊
徐小鳳一共八場《小鳳姐走過順逆流，依然金光燦爛徐小鳳2014演唱會》前晚在紅館圓滿結束，當晚嘉賓星光熠熠，包括汪明荃、趙雅芝、凌波、金漢及黃秋生等。
嘲盧海鵬醜
前晚小鳳姐繼續發揮幽默本色，她穿胸前有白玫瑰圖案的美人魚裙出場時笑言：「出場時聽到有少少笑聲，我好敏感，呢件衫係咪着到我好肥？我要澄清，我唔係肥咗，係朵花肥咗啫。」
每次嘉賓盧海鵬着波點裙扮「大鳳」出場時，小鳳姐均笑不停，前晚她更笑到揼心口話：「死得未？每次見到你扮我都又開心又傷心。」鵬哥走下台時，小鳳姐又講笑：「咁多年嚟好多人扮過我，至醜都算係佢！」
完騷後，小鳳姐在慶功宴宣布將舉辦演唱會Part 2，不過就有一個條件，她說：「要老細應承減票價，本來680蚊，我話唔好要零頭嗰80蚊啦。好多一家大細嚟支持，唔想佢哋坐咁高都要咁貴。我啲觀眾有錢嘅太有錢，但亦有好多普羅大眾。我係香港人，都想為香港人做事，主辦單位都好支持。」
文：音樂組