祖兒聲帶爆血管大抖3個月
天后容祖兒前晚繼續聲沙沙出席唱片銷量頒獎禮，她直認病情愈來愈嚴重，日前照內窺鏡發現聲帶爆血管，嚇得她目瞪口呆，醫生勒令她要休息三個月，身為經理人的霍汶希即為祖兒暫停工作，還透露已賠上數百萬商演費。
容祖兒、譚詠麟（阿倫）、何韻詩、鍾欣潼、鄭嘉穎、林欣彤、許靖韻及韓國組合Super Junior-M的Henry等歌手，前晚出席「第十二屆IFPI香港唱片銷量大獎」頒獎禮，狂擸四獎的祖兒因聲沙未有獻唱，她說：「英皇春茗之後去睇醫生，照完內窺鏡後見到成條聲帶爆咗血管，真係呆咗，醫生話一定要抖三個月，等粒息肉慢慢消失。」祖兒坦言開刀會影響把聲，故堅決不做割除息肉手術。
「成肚都係類固醇」
由於祖兒將擔任本月底假紅館舉行的「伍樂城幻想國度作品演唱會56X LIVE2014」嘉賓，祖兒一臉無奈說：「依家好迷惘同掙扎，好想做，伍樂城寫過好多歌畀我，自己真係唔想甩底。」祖兒承認得悉病情即推掉很多工作：「推得已經推晒，冇得推要頂硬上，又唔想咪嘴。」她透露現時有食西藥及類固醇：「成肚都係類固醇。」同場的阿倫直指祖兒喉嚨過分勞損，叮囑她要多休息，他亦曾經胃液倒流食藥四日。
伍樂城勸多休息
祖兒經理人霍汶希透露上周三與祖兒及容媽媽食飯，她說：「有叫祖兒唔好博到咁盡，佢情緒好低落同困擾，依家會畀佢休息，賠咗幾百萬商演費出去。」而伍樂城昨日在電話中說：「我覺得祖兒依家最緊要休息。（怕唔怕祖兒唱唔到影響個騷？）唔諗呢啲，一路都有同佢保持聯絡。」
採訪：音樂組