JC處女騷 Lea T.教捽技 攬high
有「警鐘胸」之稱的模特兒Jessica C.及霍啟山緋聞模特兒女友Lea T.下月出席名酒派對，JC將奉獻擔任DJ的第一次，為做足準備，她向Lea T.學師捽碟，兩女一邊捽一邊玩，high到跳埋舞，真係冇佢哋符！
JC下月8號獲名酒品牌軒尼詩邀請，為「Hennessy V.S.O.P Electrosonic Party 2014」化身DJ打碟，由於JC對是次處女騷非常着緊，故日前請教有經驗老友Lea T.，上堂偷師當熱身！為投入派對狂歡感覺，兩女均以性感吊帶裙谷胸上陣，JC甫見打碟設備已表現興奮，忍不住伸手周圍摸，至於「老師」Lea T.就捉實「學生」JC戴上耳筒，從旁指導對方聽音樂捽碟，最後二人捽到跳埋舞，舉手投足high爆，猶如置身夜場！
逾千觀眾前表演
兩女上堂後，JC已坦言極期待初次的DJ演出：「細細個試過同朋友玩捽碟，不過冇咩深入研究，但今次係第一次正式做DJ，就要喺千幾人面前表演，齋講已經好興奮，我都好鍾意音樂，將現代同埋傳統音樂mix埋聽就最正！」
期待穿性感紅裙
Lea T.表示屆時亦會出席，但就冇預緋聞男友霍啟山一同狂歡，她說：「我去支持JC，做佢fans囉！同埋嗰日係『三八婦女節』，女仔梗係要玩埋一份，大家可以齊齊着紅色緊身裙，性感同靚就得！」
攝：沈健程
地點：Magnum Club@中環
JC髮型及化妝：Gary Sun@Le Salon／Dora Chan@Spotlight Image Workshop
文：專案組