《阿凡達》（Avatar）男星森禾霍頓（Sam Worthington）周日於紐約街頭毆打記者的短片曝光，從中可見原來除了他火遮眼動粗之外，其模特兒女友Lara Bingle亦跟記者埋身肉搏，試圖搶去對方的相機。
澳洲男星森禾霍頓周日與模特兒女友Lara於紐約行街，期間他因難忍一名姓李的華裔記者全程貼身跟拍，兼一度踢傷Lara的小腿而出手打爆對方鼻樑，雙方發生衝突的短片更於日前曝光。
片中李姓記者大叫：「呢個男人（森禾霍頓）想郁手打我！」隨即被對方揮拳打傷鼻樑，之後原來Lara亦有郁手，發晒狂想搶去李姓記者手上的相機，一度埋身肉搏，兩人幾乎在地上扭作一團，而森禾霍頓即站在旁邊手指指爆粗：「你想踢X我老婆？」
雖然他曾試圖拉走Lara，但Lara看到記者起身準備走佬時，即再度發火，出盡力喪扯該名記者的外套，務求要搶到相機為止，不停大罵：「唔好再跟住我！」李姓記者即大叫：「你做咩呀！咪掂我！」期間森禾霍頓向現場其他記者解釋：「呢條友竟然踢女人！」相當火滾！
事件不久驚動警方到場，森禾霍頓與Lara一齊手拖手步向警車，向女警員解釋事件經過：「呢班友竟然踢女人，就咁突然出現，實在太過分，而且佢（李姓記者）依家仲要繼續拍緊片！因為Lara打電話畀我話：『有個男人襲擊我。』所以我就落樓捉住佢兼將佢推開。佢唔可以咁做！」
期間森禾霍頓試圖說明自己身份：「你有無睇過《阿凡達》呀？」不過卻被女警員無視，繼續了解事件經過。最後，森禾霍頓仍被戴上「孖葉」，押返附近警署，至於有份出手的Lara卻無事甩身。
文：外娛組