葉翠翠丁母憂 忍淚開工
飽受喪母之痛的葉翠翠，昨日仍然堅持開工，為新擔任主持節目《姊妹淘》進行拜神儀式及錄影。問她為何不放假休息？神情落寞的翠翠最初仍表現冷靜，但說不到兩句隨即哭起來，她說：「冇請假，我尋日拍拍吓嘢收到消息……」之後便哭了起來，訪問要暫時停止，翠翠要入廠內平復情緒。
莊思敏讚專業
記者會隨後繼續進行，由莊思敏與楊秀惠送上禮物歡迎新主持葉翠翠及吳若希，翠翠全程眼濕濕，強顏歡笑拍照。翠翠再接受訪問說：「尋晚拍緊《搵個好男人》，屋企人打畀我話媽咪停咗心跳急救緊，我趕到醫院媽咪又有番心跳，因為應承咗監製話睇一睇就再返去開工，逗留咗20分鐘諗住返去，同事叫我唔好返去喇。一行開媽咪又停咗心跳，但一返轉頭又有番心跳，我知道媽咪如果講到嘢都一定會叫我返工，今日繼續開工係唔想突然唔返工影響到其他人，亦好想做好自己嘅工作。」
翠翠被問到媽媽的死因﹖她說：「佢身體一向都唔係幾好，之前做咗器官移植手術出現咗併發症，入咗醫院已經兩星期，期間試過停止心跳，要靠強心針維持生命，好唔捨得佢。」翠翠講到能夠見媽媽最後一面情緒再激動喊起來，她說：「佢停止心跳嗰一刻都喺佢身邊。」莊思敏和楊秀惠與翠翠一起拍攝節目，她們大讚翠翠：「佢好專業，但大家都勸佢早啲返屋企休息。」
另葉翠翠昨晨在微博留言悼念亡母，內容感人：「希望我能代你受痛苦，能把你帶離黑暗，請讓我下輩子再次成為你的女兒……我愛你媽咪，請你安息。」其後獲蔡少芬留言鼓勵：「想哭想叫就讓自己情緒出來……別忍讓！願主安慰你心！平安！」
文：影視組