祖兒見「師母」冇被催婚

祖兒昨日與經理人霍汶希到灣仔錄影由黃秋生及黎芷珊主持的無綫新節目《燭光晚餐》，祖兒指自己喉嚨與腿部肌肉均感不適：「十級沮喪，把聲未好過，元宵仲要去內地工作，我怕人哋會以為我呃人，有乜理由咁耐都未好番，但醫生話我只有一個方法好，就係畀啲時間。（男友點安慰你？）冇用，我始終係靠把聲搵食，點都係唔開心。」

情人節冇得慶祝

祖兒又笑言如果元宵前身體能痊愈就「乜都得」，她說：「我願意戒食最鍾意嘅魚柳包，（情人節點過？）我要去長沙工作，（男友陪你？）冇喎，亦冇提早慶祝，冇預備禮物，（想佢送佢條聲帶畀你？）哈哈哈，唔好引我笑啦！」

祖兒在新年期間與劉浩龍四出拜年。（資料圖片）	芷珊大讚敢言的秋生做主持有優點。	霍汶希為無綫節目《燭光晚餐》做嘉賓。

問到祖兒早前與男友拖手仔拜年是否很開心，她說：「又講呢啲？我懷疑我部車被人裝咗跟蹤器，點解成日都被人跟到？（同咗男友家人拜年未？）有去拜年，我好有家教。（伯母催你哋結婚、恨抱孫？）催咩啊？邊有咁快？淨係講恭喜發財，身體健康咋！」

秋生唔知龍兒戀

同場的秋生被問會否邀請陳芷菁做節目嘉賓，他說：「唔係會定唔會嘅問題，係嘉賓一早定好晒，為乜搞埋呢啲噱頭？嘉賓名單係TVB定，有啲名我唔認識，都唔知可以問乜。今日請容祖兒同霍汶希就有趣嘞！（問祖兒拍拖嘅嘢？）我都唔知佢同邊個拍拖，問佢今晚得唔得閒同我睇戲仲好啦！」

芷珊則指秋生有優點，故被選中做主持，她說：「公司睇中秋生講嘢夠大膽、啜核，節目名都係秋生提議，遲啲會請袁詠儀、吳君如、港姐冠軍陳凱琳，同埋秋生心目中女神張天愛做嘉賓。」

此外，秋生早前就退選演協會長寫信給曾志偉，道明原委，問到秋生可有收到志偉回覆，他說：「冇呀，我唔等o架啦！」

文：影視組