祖藍入廚搶火毛都甩埋

王祖藍領軍的無綫新劇《食為奴》下星期一出街，台前幕後包括監製黃偉聲、祖藍、萬綺雯、張繼聰、林盛斌等，沿用熱爆劇《老表，你好嘢！》班底，笑彈火力十足配合胡定欣、黃智賢及新人何雁詩等新元素擦出新火花。

以自成一派的搞笑手法在劇中孭重飛飾演高天寶的祖藍，自小吃盡珍饈百味，憑一張嘴一試便知龍與鳳，惜這位「富二代」家道中落，流落江湖賣藝維生，性格滑稽、無厘頭又多計的他後來鹹魚翻生成為御廚，與飾演四皇子的黃智賢識於微時肝膽相照，兩人甚有《小寶與康熙》feel。

劇本班底紮實

祖藍這位「天才小廚師」拍攝時卻「老貓燒鬚」發生意外：「戲裏面好多煮餸戲，有場戲整『火燄雪山』，點知發生工業意外搶火，搞到我啲眼睫毛冇晒，之後幾日都化唔到妝要素顏上陣。」他說《食為奴》由劇本到班底也十分紮實有質素，故會加倍努力谷劇造勢。

右起：王祖藍、何雁詩、金剛齊齊發放笑彈。	王祖藍、胡定欣演一對。	胡定欣為了演活京城第一美女，不惜修眉扮柔弱。

劇中胡定欣及何雁詩先後與祖藍擦出愛火，扮演京城第一美女的定欣更有突破性演出，她說：「為了演好索女角色，我要為藝術犧牲，我嘅眉毛比較濃密，睇落比較硬朗，為咗可以女仔啲專登修眉。嗰排啲同事見到我都覺得我唔同咗，話我點解女仔咗咁多嘅？有啲仲笑我係咪整咗容，但係拍完劇就冇再修眉了，哈哈！」

定欣覺得索女不易做，與現實的她性格完全相反，她說：「以前做過嘅角色都唔係標榜自己係靚女，今次角色同真實嘅自己完全相反，角色好斯文，開工都要特別控制自己面部表情，要冷靜啲，情緒唔可以有太大起伏，舉手投足都以靚行先。」

文：影視組