謝安琪一孩政策馬上買樓

「人母級女神」謝安琪（Kay）馬年被批易有第二胎，囝囝張瞻亦扭計向她「催生」要細佬，但張氏家族勝在似足「AKB48」夠晒熱鬧，囝囝很快便打消念頭，令Kay安心繼續行「一孩政策」，兼一心一意計劃第三個紅館個唱及一圓業主夢。

謝安琪向來有鋪派利是癮，今年準備了幾萬元豪派利是，提到屬「蛇女」的她去年犯太歲，她總結蛇年運程不錯：「我上年冇攝到太歲，可能我嫁出咗之後都唔理攝唔攝，起碼唔使攝灶罅呀！但我都好滿意蛇年，因為成年都好忙，我以為自己做咗空姐，每日都要飛，有時都唔知自己喺邊個城市。」

長期做空中飛人

長期過着「空中飛人」的生活，有時也難免會掛住老公張繼聰及囝囝，幸好有科技可維繫感情，Kay笑言：「我哋成家開咗個群組，真係要讚吓啲老人家叻叻豬，識得用智能手機，阿媽成日錄音畀我，關係比以前更好。」

已是一子之母的她被批馬年容易有第二胎，問到可會計劃生B？她笑言：「馬上生B？其實我小朋友有講過想要一個兩歲嘅細佬，但佢人生好吃得開，自從喺學校識到朋友仔後，佢社交圈子遍布全球，連洛杉磯幾個州都有朋友。加上我哋屋企係AKB48，長期都好多人，有人出Trip就換第個湊佢，好熱鬧，之後佢就冇再提出過要細佬。」