千嬅出動搶冰鮮雞過年
有仔萬事足的楊千嬅早已歲晚收爐，連日來四出為丁家辦年貨。近日禽流感肆虐，本港昨日開始更無活雞供應，嚇得千嬅昨日一早急急親自出動到超市買雞做節過年，雖然只能買冰鮮雞頂替，不過要求完美的千嬅仍於櫃前左挑右選，確保有肥雞過年！
年近歲晚，身為丁家乖巧新抱的楊千嬅忙於打點一切，昨午約3時就見她帶助手到中環買餸，由於今年禽流感肆虐而令過年無活雞供應，千嬅當日早上已直接出動到超市搵雞買，更單刀直入問售貨員「有冇黃油雞」，未知是否怕冇雞做節，千嬅連冰鮮雞也不放過，不過追求完美的她拿起冰鮮雞左揀右揀一輪後，連同賀年食品和食材急急埋單畀錢走人。
率先瘋狂購物
而日前千嬅已率先獨自現身海港城辦年貨，她先到任代言的護膚品牌Osiao專櫃掃貨，不消十分鐘便擸走大袋戰利品。其後千嬅主攻飾物，不時將耳環和頸鏈拼上身襯，再轉戰童裝鞋部，看來想為囝囝揀對新鞋拜年，卻被在旁的女裝鞋吸引，行到攰的她亦不理身份坐低試鞋。
最快明年追B
事後千嬅在電話訪問中承認最近的確忙於辦年貨，又大爆Torres盡得丁子高遺傳，經常整蠱她：「我阿媽叫我做『阿嬅』，阿囝就專登係我啲朋友面前叫我做『阿嬅』，之後仲要格格笑！」最近頻頻被傳再度有喜，她否認說：「食得多肥咗啫，我都想生，但做完手術冇幾耐，休養吓先，最快出年先生。」忙於辦年貨的豈止千嬅一人，汪明荃和羅家英就在微博大晒自家製的15底蘿蔔糕，賣相精緻，連千嬅也留言大讚。文：音樂組
攝：追蹤組