發哥讚霆鋒cool得幽默
兩代影帝周潤發與謝霆鋒最近合作新片，日前發哥在北京接受《東網》專訪，大讚霆鋒chok爆及有其獨特cool gag，並堅持他年前一句「將來香港影壇靠晒佢」的看法！發哥又比較霆鋒及黃曉明兩位影星，指曉明熱情及具書卷味，霆鋒則冷艷得像俠士西門吹雪！
【陳偉立北京直擊】國際巨星周潤發年前曾公開讚謝霆鋒前途無限，將來的影壇「靠晒佢」，最近兩人在賀歲電影《賭城風雲》中飾演師徒，霆鋒飾演的「晒冷」為了拜發哥飾演的「石一堅」為師，盡顯拚命本色，在發哥大宅內吊威吔砌啤牌塔，贏取發哥注意，這場戲令人印象深刻！日前發哥在北京接受《東網》專訪大談這位「徒弟」。
有charm有天分
看着霆鋒成長的發哥，當年是否已想到他有今日的成績？發哥說：「靚仔就靚仔喇，佢入行後睇到佢一直嘅表現，都好欣慰！我識佢老爹（四哥謝賢）同媽咪（狄波拉），佢哋個仔可以繼承父業母業，又可以畀香港電影多個人用，每代要出一個演員好難！要有分量、charm、刻苦耐勞又有呢個talent（天分），唔多囉！」發哥表示每位演員的生命力會隨歲月增長，霆鋒本身已有很多經歷，故毋須刻意提點他。
年前發哥與內地小生黃曉明合作電影《大上海》，對於霆鋒、曉明這兩位炙手可熱的影星，發哥風趣的比喻：「佢兩個唔同，曉明熱情，多一份書卷味、書生啲，霆鋒冷艷，似一個武俠小說人物——西門吹雪呀！冷！」
希望再能合作
發哥說：「霆鋒喺《賭》片釋放獨特cool gag，佢係好冷嘅人，有自己一套冷幽默，但呢個戲唔係咁全面睇到發揮，如果搵套戲重啲嘅，就可以作個後論。（想下次演咩？）冇所謂，總之演技上有啲火花就開心！（《春光乍洩》咁得唔得？）Er……咁我好似蝦佢啲喎！哈哈哈！佢唔會鍾意我咁嘅年紀嘅人啩？除非我角色係風華絕代，佢要鍾意我到不得了，都好睇嘅，兩個男人！」對於霆鋒被封「chok王」，發哥笑言沒有跟他鬥chok：「如果鍾意周潤發嘅，唔係睇佢chok啦下話？係睇佢求求其其、親切啲啦！」
早前四哥及拉姑曾到拍片現場探班，發哥跟老友聚頭暢談，笑言沒有回想當年拍戲的往事：「過咗去仲諗乜鬼，我哋展望將來啦！拉姑都湊緊孫啦！」又笑言想再與四哥過戲癮，問到覺得四哥還是霆鋒較靚仔？發哥笑說：「兩個唔同年代嘅靚，風華絕代就四哥，依家都咁有型！霆鋒就係另一個時代嘅icon。」
《東網》遠赴北京獨家專訪影帝周潤發，今日播出《周潤發專訪5》，他繼續滔滔不絕分享人生閱歷，大家密切留意。
解構西門吹雪
西門吹雪是已故作家古龍作品《陸小鳳傳奇》中的經典人物，他愛穿白衣，因劍法舉世無雙，外號「劍神」，其性格冷傲孤僻，只得陸小鳳才稱得上他的朋友，予人冷漠無情的感覺。過往有不少演員如惠天賜、鄭伊健、何潤東等演過西門吹雪，都成為經典。