鬼妹仔性格想帶出正能量
Ella遭網上欺凌，與她相識逾十多年的張敬軒昨在長途電話回應時表示，眼中的Ella心地善良：「係大愛嘅人，可能佢覺得社會太多負能量，想帶多啲正能量出嚟啫，加上佢鬼妹仔性格，成日都詞不達意，有時佢寫嘢畀我，我都睇到抓晒頭，佢今次只係無心之失啫。」他覺得今次事件回響大，跟香港新移民增多及太多遊客湧入有關，覺得政府應想方法解決問題，如提高來港旅遊的門檻。問軒仔可遇過網上欺凌？他說：「多到唔記得，啲網民寫嘢係唔使負責任，好多都小事化大，所以我哋作為公眾人物，言論要正確啲。」
而黃秋生接受電話訪問，亦聲援官恩娜：「叫佢唔使理嗰啲冇包容能力、連中文都唔識、『包容』同『容忍』都分唔清楚嘅狹隘民族主義者，無謂為咗啲廢物影響自己情緒！呢班人係專匿喺電腦後面恰人嘅失敗者。佢哋係惡意中傷，唔需要包容，好明顯成班人喺度欺負弱女，仲扯埋護照嚟講，關咩事？呢班人咁愛國唔好食麥當勞、唔好睇AV吖，成班正契弟！」