蕭正楠讚阿田柔在骨子裏
當講不停的田蕊妮，遇上文靜的蕭正楠（Edwin）會如何？結果是負負得正！阿田主動出擊，才發現原來Edwin不想與她對話全因她的一副硬朗樣累事，對症下藥後，竟激發Edwin的搞笑潛能，成為片場笑匠！雖然相識日子不長，但Edwin卻看透阿田，指對方表面堅強，實情骨子裏柔情似水！
田蕊妮 = 田
蕭正楠 = 蕭
主動打破悶局
蕭：初初覺得你寸嘴又有攻擊性，咪唔敢同你講嘢，就算見到都費事撩你。
田：你又好好咩，靜到死，喺公司見你都冇咩點打招呼，直行直過，後來知道要同你拍《巨輪》，印象中你比較o靚仔，好孩子氣，心諗得唔得o架？監製就覺得有信心。
蕭：係咁o架咩？
田：埋位頭一個星期你好奇怪，好似好抗拒我咁，一cut機你又攬住背囊坐埋一邊，唔係睇手機就係睇劇本，好似自閉咁！
蕭：唔係吖，我會同工作人員講嘢……
太過硬朗嚇怕對手
田：只係唔同我講囉！真係嬲嬲哋！後來先知我個樣比較硬朗，你唔知點同我講，之後我咪同你「打車輪」，不停撩你講嘢囉！
蕭：你成日都high，NG幾次都仲笑緊，笑點好低，幾日後諗起又笑一餐。
田：係呀，有時喺屋企諗起又笑！記得有次拍一場食好多花生糖嘅戲份，最後飽到要吐出嚟，跟住你拎個紅色兜叫我吐落去，仲話平時臨時演員喺度屙屎。
蕭：我都係將廠入面嘅趣事分享畀你。
田：之後你仲癲呀，每次拎唔同道具，有次抬住個收音機入去，氹得大家好開心，真係好無聊。
蕭：開頭唔係點同你講嘢，你戲入面又長髮look，懶清純咁，戲中又好錫我，默契就慢慢出咗嚟。你份人好直，會話我啲感情唔係好真，直覺認為呢啲人唔會壞心腸。
田：你仲有樣嘢好，就係專注拍戲，唔理咩角度會靚仔啲，唔計較外形，好有魅力。
蕭：咁留意？你夠愛到老公飛起，簡直係上帝咁！
後記
阿田自「撻着」Edwin後，真的成個人有晒趣味，訪問當日，二人甫見面即喋喋不休講唔停，儼如10年冇見。大唔透的阿田，先於Edwin背後整古做怪，又嘟嘴扮鬼臉，一時又作狀打他，令Edwin不懂招架，只於鏡頭前露出招牌笑容，後來於阿田過度活躍感染下，Edwin才慢慢warm up起來作出互動，惹笑非常。
筆錄：影視組
攝影：沈健程
場地：Dream Cafe