發哥心痛老婆被屈:佢做咗醜人
【陳偉立北京直擊】銀幕上風流倜儻的影帝周潤發，現實中是個絕種好丈夫！結婚廿多年的發哥日前在北京接受《東網》獨家專訪分享夫妻相處之道，對於外間指發嫂管錢又代推片約，發哥出口護妻說：「誤會咗佢，有時佢做咗醜人o架啫！」
影帝周潤發與「發嫂」陳薈蓮於1986年結婚，跨越銀婚紀念依然恩愛如昔，羨煞旁人。發哥曾與無數女星合作，婚後一直零緋聞。日前他在北京接受《東網》專訪，問他有何保持「清白之軀」妙法？發哥笑說：「演員喺戲入面有好多艷遇，三個月拍套戲，你咪愛足佢三千年囉！完咗之後就『叮』，玩完囉！電影入面咩都有，浪漫、殉情都有，咁你仲需要咩？（平時冇女仔投懷送抱？）係親切囉！最多都係叫發哥影張相，冇咩嘢。」
放心發嫂管財政
坊間盛傳發嫂「管教」甚嚴，除了掌管財政大權外，更為老公推劇本。發哥對此為愛妻不值：「關於劇本，某程度上都要我鍾意先嘅，誤會咗佢啫，有時佢做咗醜人o架啫！（錢呢？）錢呢樣嘢，佢管理我放心，我唔太Care，反而你有咗呢啲就唔會集中精神做嘢，會想開餐廳、投資呢啲嗰啲！分心咗，我老本行都係演戲，呢啲嘢唔好煩我。」
問到如何Keep恩愛？發哥自言已練成「零脾氣大法」，往往由他主動Say Sorry減少磨擦：「盡量兩個人夾筍位，一個凹一個凸。人生好多嘢未必係對與錯，拗落去冇咩意思，不過多數都係我衰架喇！我比較粗魯啲，又唔係好顧細節，如果我唔覺意整到啲嘢，話對唔住啦！」
女人茶煲需忍讓
發哥重提《秋天的童話》的經典角色船頭尺，大膽笑指女人都是Trouble：「你冇睇船頭尺咩？Trouble吖嘛！女人係茶煲嚟o架嘛！個茶煲煲咗，你仲倒啲油落去，你咪死得？（發哥完全冇脾氣？）嘥氣啦！我喺個心度笑，你咪嬲死佢囉！你嬲又唔係我嬲！」
on.cc東網
《東網》遠赴北京獨家專訪影帝周潤發，今日播出《周潤發專訪3》，他繼續滔滔不絕分享人生閱歷，大家密切留意。