陳凱琳魔笛狙擊主場夠殺
眾華姐昨日首次以三點式上陣為今晚的決賽綵排，其中(4)胡佩玲、(5)陳凱琳、(9)黃婷麗、(14)戴婕菲及(16)鍾熠狀態大勇，香港代表陳凱琳雖然身材上有點輸蝕，但因有主場之利而顯得明艷照人，她信心十足之餘，亦獲眾佳麗睇好是奪標大熱，陳凱琳今晚會繼續表演吹笛和唱歌騷才藝，希望憑此爭取評判歡心。
由無綫主辦的《2014國際中華小姐競選》今晚舉行，16位候選佳麗昨日以三點式上陣綵排，佳麗們的身材都表露無遺，現場所見，以(4)胡佩玲、(5)陳凱琳、(9)黃婷麗、(14)戴婕菲及(16)鍾熠的狀態最弗，其中香港代表陳凱琳更獲其他佳麗看好可奪冠而回。陳凱琳對自己亦甚有信心，表示狀態不錯：「尋晚（前晚）只係瞓咗3個鐘，今日都頂得住，因為覺得有啲排舞同排位仲要多啲訓練。」
爭取時間練到足
已奪才藝表演獎的陳凱琳自覺上次表現未達標，故要再加強訓練：「都係會吹笛同唱《我的驕傲》。」她笑言不會再練到三更半夜，影響其他佳麗睡眠：「我同佢哋講咗12點前就會吹完。（同房嘅(6)黃之豫有冇投訴？）佢都幾鍾意聽我吹笛。」她又表示自己優勝之處是跟家人關係好：「家人會嚟睇我比賽同打氣，我見到佢哋就會放鬆。」
大熱之一的胡佩玲出場時刻意趷籮搶鏡，但就「趷過龍」腳震震，她解釋因緊張而腳震：「高踭鞋唔穩，又第一次單獨着泳衣上台，所以好緊張。」
胡佩玲自覺表現比首次見傳媒時好，問是否有信心入三甲？她說：「今次係嚟學習，唔想只係將專注力放喺獎項上，要記其他嘢，贏唔贏到要睇評判。」她又表示睇好陳凱琳：「佢好好人，言談舉止都好好，而且佢仲攞埋才藝獎。」
(7)束雯想做特工
擁有33吋導彈胸的(3)區思敏及谷胸的(11)李嘉嘉及(13)張佩雯就上圍跌盪，而(7)束雯的志願是成為聯邦調查局特工，果然夠出位，她更因縮肚過度而現出肋骨。昨日佳麗們亦即場投票互選「友誼小姐」，最後由張佩雯奪獎，談到過往的友誼小姐甚少機會入三甲，她表示：「贏不是最重要，最緊要是得到友誼和豐富經驗。（有信心拿冠軍？）每個人都有機會，但因為我不懂說廣東話，所以都要努力。」她又表示睇好陳凱琳：「她很好又能跟香港人有聯繫，胡佩玲和戴婕菲也很有機會。」
文：影視組