霆鋒同前輩鬥chok
【蔡志豪澳門直擊】藝人謝霆鋒、周潤發昨晚在澳門出席主演電影《賭城風雲》首映，霆鋒戴住黑超行紅地氈，之後打手印及祝酒則畀面暫除黑超示人，chok到連發哥也大讚：「佢永遠都咁靚仔！」有指發哥拍攝時「大蝦細」，霆鋒就否認其事。
藝人謝霆鋒、周潤發、杜汶澤、內地藝人童菲、孟瑤等，昨晚在澳門出席電影《賭城風雲》的首映，戴上黑超的霆鋒以招牌chok樣行紅地氈，而發哥就翹實發嫂壓軸出場，兩大型男殺到埋身，即獲全場歡呼！霆鋒與發哥聯同導演王晶、劉偉強齊打手印及舉行祝酒儀式時，霆鋒則畀面除超拍照。
搞爛gag緩和氣氛
兩位chok神受訪時，霆鋒又戴住黑超，記者笑問二人是否要鬥chok？chok到骨子裏的霆鋒就似乎不知如何回答，發哥就為他解圍說：「唔好搞到佢咁尷尬，佢永遠都咁靚仔！」早前有報道指發哥在拍攝時「大蝦細」，霆鋒聞言即否認：「唔係，唔係。」發哥則大搞爛gag說：「唔係蝦、唔係蟹，就係魚。」之前霆鋒被胞妹婷婷大爆他拍攝《賭》片時感壓力，霆鋒直認：「係有嘅。」但發哥直言感覺不到，更大讚霆鋒打得、演得又靚仔。煮得一手好餸的霆鋒稱未有見過發哥在片場食嘢，故未有機會請他試自己的手勢，發哥幽默解釋：「冇喺你面前食啫，我未達標（身形）呀！」
祝願兩片好成績
新年期間，發哥有兩部主演電影《賭》片和《西遊記之大鬧天宮》同時上映，自己打自己，他謂以戲份計《賭》片是五五，《西》片是三七，他是三，甄子丹是七，但他希望兩部也能有好成績。
談到日前霆鋒斥責有新人遲到，令他大動肝火，問到他該新人是誰？他謂：「我只係講新人、舊人都唔應該遲到，冇講其他嘢。」另外，霆鋒透露不會在港過新年，亦不會到新加坡探兒子，一問到關於一對兒子的問題，他就cool爆說：「唔講小朋友。」至於首次和霆鋒、發哥合作的童菲，否認是霆鋒所指的新人：「不是我吧！我不知道，我沒有遲（到）過。」