落選港姐沈桂澄認兩小無猜
賭王何鴻燊四房兒子何猷君日前被拍得到中環夜蒲，被一名長髮美少女主動「抄牌」，昨日有讀者報料該長髮女身份，正是去年落選港姐沈桂澄，雖然當晚女方主動埋身，不過四太梁安琪卻代子澄清「百分百冇嘢」！
何猷君貴為鑽石筍盤，每次到夜店消遣都會成為群女的「狩獵」對象，日前猷君被本報拍得撇甩女友Francesca，與一大班男友人夜蒲中環，當入場不久即被一名戴冷帽和長髮的美少女留意，其後成功抄牌後更整晚密密傾，離開時更獲猷君接載返家。而昨日有讀者爆料該名女子的身份，原來是去年落選港姐沈桂澄！
黑色冷帽洩密
去年沈桂澄參選期間，已被踢爆是周家蔚的親戚，雖然她最後落選收場，但跟港姐蔡思貝感情要好，經常相約見面，而她在社交網站Instagram中不時上載打扮性感的夜蒲照，她向猷君搭訕當晚戴住黑色冷帽，她昨日依然不避嫌將冷帽look放上網，即被朋友認出兼留言笑她溝富二代。雖然她主動向猷君抄牌，但據知已有一名拍拖多年的男友。
四太澄清冇嘢
四太接受電話訪問時，力證兒子與Francesca情未變，原來她亦認識沈桂澄，她說：「我知，佢參選時仲話自己有個新加坡男友。猷君同佢男友係同學，（當晚好好傾？）佢大過我個仔，仲大過佢男友一年，之前佢男友放假返香港，仲嚟我屋企住幾日，佢哋（指猷君跟沈桂澄）百分百冇嘢！（主動送個女仔？）佢懶有風度啫！」問到會否反對兒子與明星拍拖？她說：「佢哋鍾意咪得囉，依家最緊要講『愛』嘛！」至於沈桂澄亦否認與猷君拍拖，她說：「我哋係好朋友，好細個已經識佢，係小學同學，總之冇拍拖啦！」
文：專案組