鄧麗欣淆底拒發誓證未婚
早前被《好報》踢爆與方力申（小方）秘婚、座駕更換上「SF」車牌力證「方太」地位的鄧麗欣，前晚出席新片煞科宴時，冇膽發誓證未婚：「查到真係結咗仲解釋唔到，我唔夠膽講大話！」
鄧麗欣（Stephy）早前被《好報》踢爆其新座駕掛上代表「Stephy Fong」的「SF」車牌，以宣示其「方太」地位，前晚她與黃宗澤、陳嘉桓及謝天華等出席電影《男人唔可以窮》煞科宴時，記者即恭喜Stephy榮升「方太」，她卻笑稱是「闊太」：「我唔係方太，我老公姓闊，叫我闊太。激死喇，最嬲嗌我闊太，我根本就唔係，第一我未係阿太，第二我唔闊，依家用緊自己賺嘅錢，唔係用緊老公錢，（已婚？）梗係未啦！」
笑小方冇膽
當記者要求她發誓證未婚時，Stephy卻未敢行動：「使咩發誓？如果我依家講到咁，到時畀你哋查到我真係結咗，咁我仲解釋唔到。（鋪後路？）唔係，我唔夠膽講大話，對我哋嚟講真係唔需要（發誓），我哋依家咁公開，到開心嘅時候會同大家講。」她又堅稱小方未求婚，並笑指對方唔夠膽：「佢做每樣嘢都要100％肯定做到先做。（幾時結婚？）未知。（佢係結婚對象？）未到最後一刻都唔知，暫時OK，佢都合格。」至於小方接受電話訪問時，力撐Stephy反應正常：「咁真係冇秘婚嘛，我可以發誓o架！」煞科宴上，黃宗澤拿Stephy開玩笑說：「人哋名花有主，唔好搞人啦！望都望少兩眼，唔敢望呀！」此外，陳嘉桓穿低胸連身短裙亮相，非常搶鏡，劇組全體人員都不敢正視她。
文：影視組