發哥搶咪禁子丹爆片酬

周潤發、甄子丹與郭富城三位巨星昨日齊集北京為新片《西遊記之大鬧天宮》造勢,身為影壇大哥的周潤發心情大靚,全程妙語如珠放笑彈,與「宇宙最強」子丹為谷戲不惜互爆秘史,發哥踢爆子丹脾氣差,子丹也不甘示弱,反踢爆發哥片酬高,發哥聞言即搶咪叫停,場面惹笑!

以6億元巨製及巨星打造的星皓電影《西遊記之大鬧天宮》,昨日於北京舉行全球首映禮,為配合電影主題,大會把場地布置成龍宮,並掛上12位主角的個人海報,還有一個1:1孫悟空模型,而「玉帝」周潤發則率領甄子丹、郭富城、何潤東、陳喬恩、張梓琳等演員現身,陣容鼎盛。

玉帝灌醉自己

一眾演員輪流於台上分享拍攝點滴,當中以周潤發最為風騷,不時搶咪發放笑彈,首先有份演出的內地演員誤把該片形容為土產3D電影,發哥幽默地謂:「呢套戲係有美國公司做後期製作,唔係土產電影。」及後發哥於談及其角色時,就表示「玉帝」給他的印象,只是齋坐邊食水果邊欣賞美女跳舞,惟他卻要對住塊布做戲當打星,故只能灌醉自己,才可以於虛幻感覺下幻想有美女在旁翩翩起舞。

講到興致勃勃的發哥,還把身兼動作導演的子丹擺上枱,踢爆他脾氣差,他謂:「子丹化特技妝要幾個鐘,化完之後真身又要打,唔使打又要喺現場大叫其他人點打,有時會按不住發脾氣,今次真係折磨夠,之後佢休息,脾氣就會慢慢好。」子丹聽後忍不住笑,並作出反擊謂:「既然你咁幽默,都要回你兩句,你好貴,所以好珍惜你每個鏡頭,又要拍得型。」為怕子丹繼續爆料,發哥即以夠鐘為理由截停子丹,並扯開話題,指子丹演的孫悟空才是真正的宇宙最強,事後發哥被問到會否擔心子丹嬲?他笑謂:「驚咩?唔使氹番,佢依家都收咗(脾氣)好多。」

即場扭腰騷quali

子丹對於爆發哥片酬高,他謂:「唔係錢問題,請得佢郁唔容易。(佢話你脾氣大?)講笑,唔通鬧自己都唔得咩!(你要求太高?)不嬲都高。」對於城城表示想與他合作拍武術跳舞電影,子丹亦即扭腰騷quali,令城城大表驚訝,並笑指可以考慮,更坦言體諒子丹脾氣不好,他謂:「都係想效果好,不過都希望佢脾氣好少少。」而演「女媧」的張梓琳則大受歡迎被粉絲重重包圍。

文:影視組