憶蓮仰慕愛郎肉麻護航
林憶蓮和男友恭碩良（Jun）一同出席自己的新碟試聽會，兩人表現恩愛合拍，憶蓮大讚男友才華洋溢之餘，又力撐Jun指唱片公司大讚其作品，為男友護航，直言仰慕對方才華，對她影響深遠！
林憶蓮前晚舉行新碟《Re：Workz》試聽會，有份參與製作的男友恭碩良（Jun）和倪凱民（Kelvin）亦有出席。憶蓮和Jun在台上不時有講有笑，她指兩人合作全無拗撬，又向男友笠高帽：「大家好仰慕對方才華同尊重對方，係好好嘅朋友，亦係好嘅工作夥伴。」有指環球不滿她企硬只揀Jun和Kelvin做唱片製作，憶蓮不忘為男友護航說：「冇聽到呢個講法，公司都話啲歌好聽好鍾意。」
讚G.E.M.出色
她又否認會參加內地節目《我是歌手2》，並坦言對歌唱比賽節目無興趣：「佢哋係有邀請過我，但檔期唔啱一開頭已經推咗。其實我唔係好鍾意比賽，不過都鍾意睇。」有指她拒與G.E.M.同台演出？憶蓮亦否認：「自己好欣賞佢，新進歌手嚟講佢好出色。」
男友影響深遠
而憶蓮在梁泰來的電台訪問中亦明言Jun對她影響深遠：「佢係我巡唱演出嘅鼓手，係重要嘅靈魂人物，佢編曲嘅想法充滿生命力，不時激發到製作團隊用唔同方式做音樂。」有指她受Jun的影響變了「Rock女」，憶蓮重申：「每個人有唔同嘅音樂喜好，我會聽我朋友所聽嘅音樂，但如果話我嘅音樂風格係受我當時伴侶影響，咁對我太唔公平。其實我由2000年嘅專輯已開始唱rock，因為媽媽嘅離世同生活環境轉變，我聽音樂嘅口味都改變。」
文：音樂組