鄧麗欣SF解畫擺粉絲上枱
歌手鄧麗欣（Stephy）跟方力申順利度過七年之癢，Stephy疊埋心水等做「方太」，心情風騷的她最近一擲百二萬豪買辣跑，名正言順以自己個名加小方姓氏作為車牌宣示主權，四圍出巡享受着闊太生活。
Stephy跟小方拍拖七年，兩人在日本沖繩秘婚的傳言甚囂塵上，日前兩人拍拖睇戲，被本報追問到秘婚消息，小方曾口快快自爆：「係呀！」Stephy被《好報》踢爆最近風騷豪擲百二萬買辣跑，在其白色保時捷更用上「SF」宣示主權，意即「Stephy Fong」，名正言順冠上「我的名字，小方姓氏」，大晒方太地位。
闊太打扮去濕平
雖然盛傳方鄧兩家因擺酒及禮金問題而吵大鑊，但夫婦床頭打交床尾和，鄧媽媽希望女兒嫁得體面，親家也是明白人，雙方已共識會搞得好好睇睇，雖然還未補辦喜酒，但有小方「照顧」，Stephy被《好報》一連幾日影到以一身富貴look享受「方太」寫意生活，過去兩年Stephy在內地密密做狂吸金，身家超過半億，繼進駐大埔比華利山獨立屋，又買靚車，又手挽逾十萬元的黑色名牌手袋，成個闊太。當日她獨個兒在中環閒逛，走去幫襯名模Amanda S.開設的餅店買cake。
揸波子接母吃飯
由於小方忙於工作無暇相伴，有一日Stephy做孝順女親駕其波子接載媽咪去吃飯，兩母女雞啄唔斷，翌日則找朋友打發時間，一齊去「濕平」歎tea；據知Stephy跟小方秘婚後仍各與家人同住，不過兩人不時互訪，兩頭住家輪住瞓。Stephy昨日透過經理人承認買跑車作為獎勵自己，她笑說：「大家諗太多啦，SF車牌係運輸署輪住發o架，我反而覺得跟我個歌迷會「Stephy Fastasia」貼切啲囉。」對同居一事，她笑說：「我哋成日去對方屋企食飯，唔係同居。」
文：音樂組