發哥論秋筋：達到目的就得
國際影星周潤發（發哥）昨日離港到北京宣傳新片，對於黃秋生被演藝人協會（演協）拒門外兼地扮抽筋，發哥笑言對方太誇張：「佢不嬲都咁激，不過冇乜所謂，最緊要達到目的咪得囉。」他又撐秋生有能力勝任會長一職。
昨日發哥偕發嫂陳薈蓮出發到北京3日為電影《賭城風雲》及《西遊記之大鬧天宮》做宣傳。戴帽兼架墨鏡的發哥現身機場時，即友善主動上前接受記者訪問，登記手續則交由發嫂辦理。提到有意角逐演協會長的黃秋生，日前被拒諸門外兼瞓地扮抽筋，發哥坦言有緊貼報道，並笑謂：「佢不嬲都咁激o架啦，（太激進？）冇乜所謂，最緊要達到目的咪得囉。」對於秋生慘食閉門羹，他認為大家可能對手續不清楚：「有啲人可能揸正嚟做，有啲人可能覺得隨時可以入會。」
佢有能力勝任
當時秋生曾說：「唔信周潤發冇交會費，會叫佢喺垃圾桶填表！」發哥聞言即說：「咁要問番入會過程先知，首先要批核咗先准入，咁就唔夠時間，要唔知幾多個會員通過先入得會，咁佢又啱喎，你地都冇用，你係未合資格嘛！（秋生覺得唔受尊重？）佢又誇張咗啲嘅，（支持對方任會長？）如果佢幫到藝人謀福利，邊個做都冇所謂，佢應該有能力。」
昨日未有出席邵逸夫爵士（六叔）追思會的他，表示有機會將到六叔墳前拜祭：「佢嘅電影、電視王國係六叔一手創辦，一切在心中。」現場有粉絲向發哥索合照，他也來者不拒逐一操刀自拍，至入閘前，有一眾學生發現發哥，發哥突然折返主動大合照，更細心到為眾人調位，非常親民。
文：影視組