秋生擦身過 當芷菁透明
黃秋生與陳芷菁爆出「演協內訌」，兩位冤家昨日在邵逸夫追思會上狹路相逢，兩人「零交流」沒有打招呼傾偈，秋生一眼也沒有望向芷菁，當她透明，他說：「我係嚟鞠躬，唔係嚟交流。」
有意角逐演藝人協會會長的黃秋生，日前就入會事宜被秘書長陳芷菁拒於演協門外，隨後兩人隔空開火，直至前日事件始緩和，二人亦取得溝通及共識。昨日十一時許秋生到邵氏影城出席邵逸夫追思會，他與負責接待嘉賓的芷菁狹路相逢。秋生到會場簽名並向六叔巨型遺照鞠躬，隨即上前慰問方逸華，當時他與芷菁近在咫尺，秋生卻沒有望芷菁一眼，反而芷菁卻禮貌地望向秋生，兩人最終只擦身而過，「零交流」沒有打招呼。
「拖都未拍講生仔」
秋生談及六叔時指他一生功績偉大，今次是笑喪，會堂氣氛不算傷感，他說：「我唔記得有冇見過佢，亦冇咁嘅榮幸同六叔食飯，當年喺TVB成日仰望六叔間別墅。六叔令香港成為東方荷里活，有大半功勞都係歸六叔嘅，但係東方荷里活嘅時代已經過去，影視嘅年代唔係話消失，係轉變緊。」
問秋生有沒有見到芷菁？他說：「我係嚟鞠躬，唔係嚟交流，係志偉叫我嚟，但見到志偉佢揚手叫我走，等演協搞掂內部嘢先，已經透過律師發信申請咗入會、填晒表、程序做足，個波交番畀佢哋喇，我要做嘅已經做晒。」有說秋生當會長，芷菁立即辭職？他即說：「到時先算啦，拖都未拍就講生仔！（芷菁叫你放過佢？）十世前嘅事，回應咗啦！（演協內部混亂？）唔知，但係十二個人入會都搞足成個禮拜。」
至於芷菁被問到與秋生碰面，彼此零招呼，會否感尷尬？她說：「唔尷尬，我嘅心情係來做嘢，佢就嚟悼念，呢個都唔係說話場合。（秋生冇望你一眼？）佢戴住黑超，我唔知佢有冇望我，我就有望佢，係禮貌嚟嘅。」又透露要再開會決定選舉會長日期。
文：影視組