關之琳走光要靚 由底做起
大美人關之琳與台灣富商男友陳泰銘拍拖至今感情穩定，不過今個農曆新年之之卻不會到男友家拜年，但就會與男友拍拖去旅行度歲。提到女星早前集體走光一事，之之坦言自己會小心做足防走光措施，更謂打底都要着得好靚。
關之琳前晚以一襲透視連身傘裙出席香港時裝周「MOISELLE 2014春夏系列時裝展」，同場的有MOISELLE太子爺陳柏熹，嘉賓有德國體操萬人迷阮馬素（Marcel Nguyen）、關心妍和丈夫楊長智、薛芷倫、周汶錡和何猷亨等。
提到現場的簽名布景板因設計問題，導致女星走光一事，之之說：「吓？咁慘！有聽到，但唔知咩事。」她表示自己平日很小心做足防走光措施，只試過一次走光經歷，她說：「嗰次我做演唱會嘉賓，唔知原來有個風口位，一吹條裙就冚上塊面，我都嚇咗一跳。（咪好似瑪麗蓮夢露囉？）夢露就靚啫，如果事前知道會走光，我打底會着靚啲，嗰次只係着咗波褲打底。自己個底要着得靚，要識執生，萬一跌低點算？自己係一個好奄尖、完美主義嘅人，打底都要好靚。」
一班人過情人節
另外，農曆新年將至，問到之之今個新年怎樣過，她說：「農曆新年會去凍嘅地方旅行，唔會去好遠，近近哋去幾日。（男朋友會唔會一齊去？）同好多朋友一齊。（會唔會去男友屋企拜年？）唔會，依家好少拜年，避年就會。（情人節男友會唔會畀驚喜你？）唔會啦，情人節應該約成班朋友喺屋企，請個廚師返嚟煮嘢食一齊慶祝。」
至於關心妍就透露父親早前離世，故今年農曆新年會留港陪伴家人。問到生BB一事，她說：「開始努力緊，搵緊唔同方法。（人工受孕？）依家了解緊，問緊老公意見，都會考慮。因為問過牧師，呢樣嘢係可以嘅。總之要make sure同我嘅信仰冇牴觸。如果真係努力多半年都唔得，夏天就會做決定。」
文：名人組