馬國明女尊男卑 任阿佘插

繼馬來西亞及韓國後，無綫《愛情來的時候》系列微電影第三集移師新加坡拍攝，今集由佘詩曼及馬國明主演，二人早前到新加坡拍外景。有傳阿佘拍攝期間姣溝筍盤馬國明，令阿佘捲入馬國明與朱千雪及朱晨麗的四角關係中，阿佘則澄清是馬國明在片中追她。

耷頭做跟班

從該片的劇照中，見阿佘以一襲露肩晚裝現身，飾馬國明上司的她更篤着馬國明心口狂鬧，之後馬國明只好頭耷耷，跟在阿佘身後做跟班，幫手拿東西。

阿佘篤馬國明心口狂鬧。

阿佘在戲中演繹強勢一面。

另一場戲馬國明又要應阿佘的要求，當阿佘的男伴，到她前男友的婚禮踩場，期間發生誤會，導致二人與警察糾纏。雖然該片沒有親熱戲，但馬國明指有二人浪漫撐傘場面，更大爆阿佘會錫他面珠。

「覺得好夾」

這次是馬國明首次與阿佘合作，馬國明認為阿佘是專業演員，更說她好靚女同好輕：「有場戲要孭佢，佢好輕，孭得好舒服。（首次合作有冇火花？）好有火花，仲會齊齊加戲同埋有啲小動作，覺得大家好夾。（同阿佘成為朋友？）以前喺電視城見到面會點頭，依家見面會傾偈。（怕唔怕傳緋聞？）唔驚，當做宣傳。都知拍嗰時有狗仔跟，多謝記者畀面，成日話我畀女溝，希望各位女演員唔好介意。」他又笑言自己艷福不淺。

文：影視組