小方承認已婚 嚇窒鄧麗欣
拍拖七年的方力申（小方）和鄧麗欣（Stephy）盛傳去年已在沖繩秘婚，「方氏伉儷」更趁今年從內地回流香港，並決定補擺喜酒，早前還被爆為擺酒及禮金搞到兩家人吵大鑊，幸好兩口子轉頭又恩愛如昔。日前兩公婆拍拖睇戲，當被追問是否已婚，小方難掩喜悅衝口而出：「係呀！」嚇得Stephy急忙說：「佢結咋，我未o架！」
方力申和鄧麗欣近年主攻內地市場，有指兩人今年會回流香港，亦有傳他們去年已在沖繩秘婚，但兩人多次被追問此事時，都是採取死口唔認態度，但其實兩人早已過着如新婚夫婦般的生活，更有指他們將在香港補擺喜酒。雖然兩人早前被指兩家人在元旦日為補擺喜酒及禮金問題不歡而散，Stephy更嬲到黑面離場。不過，正所謂兩夫妻床頭打交床尾和，小方好快已氹掂Stephy，兩人亦和好如初。
「佢話結咗咋」
本報日前便發現小方駕着Stephy的寶馬座駕返回碧荔道兩人的愛巢，上樓大約十分鐘後，原本穿短褲的小方換了外套及長褲與Stephy齊齊外出，小方駕車直駛到數碼港醫肚兼睇戲，更在雙黃線放下Stephy，讓她先去食店搵位，小方就駕車往停車場泊車，最後Stephy選擇了一間粥麵店與小方撐枱腳。
兩人吃了半小時就離開，並步往戲院睇五點半場，期間記者上前問他們是否已婚，小方未來得切反應便衝口而出承認：「係呀！」在旁的Stephy急急說：「唔好亂講嘢喎！」小方知道口快快說漏嘴，即兜番說：「係結……『結宮』個結（便秘）。」而Stephy依然不認說：「佢話結咗咋，我未結o架，唔知佢同邊個結咗喎！」
搬近父母住所
之後記者再問兩人新愛巢鄰近小方父母住所，是否方便將來湊B？小方今次醒了少少反問：「湊你個BB呀？」再問是否趕生馬年BB？小方和Stephy即甜蜜互望傻笑，未有回應便急步入場睇戲，之後散場兩人雙雙返回愛巢，未有再外出。
文：音樂組
攝：追蹤組