蕭正楠操朱古力肌等床戰
蕭正楠（Edwin）及曹永廉（阿廉）前日聖誕節為拍攝新劇《師奶Madam》的一幕踢波戲到秀茂坪開工，其中人氣急升的Edwin獲粉絲送贈聖誕蛋糕，令他當場冧爆，而他透露將操出朱古力腹肌，等拍下一套劇時拍床戰戲。
早前憑無綫劇集《巨輪》贏得高企人氣的蕭正楠，於聖誕節當日與曹永廉現身秀茂坪拍攝新劇《師奶Madam》的一場踢波戲，Edwin未埋位時，獲全女班粉絲送上聖誕蛋糕醫肚，他即報以冧爆甜笑。
監製下令健身
Edwin之後表示：「我要由1點踢（波）到11點，又凍又肚餓。依家有蛋糕食，真係正！」
問Edwin與阿廉於聖誕節都要開工，親友有否詐型？阿廉稱家人各自各精彩，而自己早已送禮物補數。Edwin則透露已跟陳敏之及黃長興等朋友開派對：「我哋交換咗禮物，我準備咗薑餅同價值幾百蚊嘅餅券，自己就抽到個化妝袋。（有冇人抽到古怪禮物？）冇，但有次有朋友抽到件肉色『腹肌衫』！」
自嘲腹肌時有時冇的Edwin預告，會為下套劇集的肉搏戲或沖涼戲操出朱古力腹肌：「下套劇嘅監製叫我操腹肌，可能要拍沖涼戲同肉搏戲。（即係打鬥戲？）我估可能係床上面嗰種。」
星馬播《巨輪》
Edwin又說將與出爐視后田蕊妮於一月到星馬地區為其代言的餅店開張擔任嘉賓，Edwin表示：「會同阿田去做開幕，同時慶祝埋《巨輪》喺嗰邊首播。」
文：影視組