子華拍劇無期 恨試勻盛女
出爐「視帝」黃子華昨晚做「老闆」請同劇演員吃飯睇新劇結局，實行「一箭四雀」開心食餐飯！問到是否兩年後再返無綫拍劇？極忙的他斷然否認，指之後要客串多部電影，壓力很大，反而希望能與劇中每位女演員都合作拍一部劇。
昨晚劇集《My盛Lady》的演員黃子華、徐子珊、陳敏之、高海寧、陳嘉佳（細細粒）、許紹雄、阮兆祥等出席於尖沙咀舉行的飯局，並為一連兩小時結局造勢，昨晚由「視帝」子華請客，眾人相當興奮，細細粒大叫子華「視帝華」時，子華搞笑地叫她走出彌敦道叫多次！
拍盡靚女
子華坦言搞此一飯局有幾個原因，可以說是「一箭四雀」：「除了我同許紹雄攞獎外，阮兆祥嘅演唱會有part2，再加上部劇受歡迎。（會唔會開拍續集？）乜集都要等好耐，未來兩年都唔得，但我有個心願，係想同每個劇中嘅女演員都拍一套劇。（會否搞舞台劇版？）冇咁諗過，上次《男親女愛》時間可以做到，嚟緊自己都應承客串好多電影，好大壓力，棟篤笑又要巡迴，都好忙。（係咪兩年後會返無綫拍劇？）絕對唔係喎！到時再睇情況。」
子珊冷病
日前以性感示人出席上海華鼎獎的徐子珊，凍到病致聲沙發燒，但昨日要為微電影造型，故未看醫生。子珊說未聞此劇會開續集，但都希望成事：「可以將呢套劇嘅元素加入子華棟篤笑內，相信觀眾會鍾意。」說到舞台劇版，她笑言《男親女愛》是經典中的經典，未敢高攀。而陳敏之則建議第二集大可以叫《My盛男》，即使等子華最快要兩年都冇所謂：「佢一返嚟我哋就齊晒人。（佢想同劇中女演員拍劇！）都想同佢拍劇談戀愛，呢套劇我淨係暗戀佢都有啲遺憾。」
文：影視組