朱晨麗舞住過節 靠掌聲支持
朱晨麗、林夏薇與謝東閔三個年輕人，自懂性後均對聖誕節沒太大感覺。朱朱每年都是忙跳舞綵排，不過有觀眾掌聲支持，亦非常值得。夏薇坦言要用勞力才能獲禮物，閔大人則難忘在外國讀書飲醉要人抬。
朱朱、夏薇與閔大人近日難得不用開工，趁聖誕節來臨前，相約到商場睇燈飾兼留倩影。雖然他們已是成年人，但面對在場的聖誕裝飾，也不理自己的藝人身份，與一眾市民齊齊逼。看見可愛的卡通人物時，更如小朋友般嚷着要拍照，認真大細路。
內地聖誕冇氣氛
對於聖誕節，三人有不同感覺。於內地長大的朱朱透露，內地聖誕節氣氛不濃厚，眾人不會大肆慶祝，直至來港生活，才開始感受到聖誕氣氛。不過身為專業舞蹈團成員的她，卻偏偏於聖誕節最繁忙。她謂：「通常呢段時間都要準備劇目，日排夜排好辛苦，記得連續四年聖誕都係咁過。（演出完去玩？）last day都會慶祝，人哋喺歡笑聲中過節，我哋就喺工作中度過。但完場時聽到觀眾掌聲，就係最大鼓勵。」
夏薇憶述八、九歲時於尖沙咀觀賞燈飾時，因掛住玩及影相，竟與雙親「失散」，不過她異常鎮定，未有流半滴眼淚。她謂：「我去咗個中心點諗住撞佢哋，點知又被我見到父母，依家諗番真係好好彩。（相信聖誕老人？）父母就係，但要靠努力換返嚟！好似幫媽咪按摩，第二日就會有份禮物放喺對聖誕襪度。我覺得依家小朋友好幸福，我細個咩都唔畀買。」
閔大人難忘飲醉
閔大人則透露對學校有十多日假期最感興趣。他謂：「以前成班同學會出去睇燈飾，亂噴雪咁好開心。喺外國讀書去飲酒都好開心，但點知第一次就飲醉之後被人抬走。以前拍拖都會兩個人喺屋企食飯，依家冇拍拖，因為我唔識浪漫，所以成日被人飛囉！」
文：影視組
攝：黎志輝
場地：海港城
髮型：Oscar Shek
林夏薇化妝：Raymond Yip