周秀娜師妹盧頌之(DaDa Lo)與同門「大隻男」趙勁皓(King)因合作電影《爆3俏嬌娃》撻着,早前兩人到西九龍中心的小型遊樂場拍拖,只見King玩遊戲得心應手,更成功夾到公仔,氹得女友相當開心,反而DaDa扑傻瓜時屢失手,要King捉實其手仔,期間King輕撫DaDa髮尾並親吻其額頭,女方則親暱摸男友臉龐,恩愛爆燈!其後他們到Food Court,King主動餵DaDa食餃子,又一杯飲品兩份飲,情深互望相當冤氣!吃飽後兩人到時裝店閒逛,但齋睇唔買,幾個鐘消費不夠100元,證明平價拍拖一樣超甜蜜。