王浩信四度提名想獲肯定

王浩信、朱千雪、港姐蔡思貝等前晚出席《歡樂滿東華2013頒獎晚會》，已提名了四次「飛躍進步男藝員」的王浩信，與太太陳自瑤（YoYo）聯手落力拉票，獲悉不少同事會投他一票時，十分窩心，問他是否在劇中被摑廿幾巴也感值得？他笑說：「今年攞唔到，下年咪要摑多啲？唔好啦，受唔到，我係正常地球人，希望今年公司畀啲肯定同支持我，不過對手都好勁，真係一年比一年難。」他計劃稍後與YoYo到峇里二人世界，不排除趁機造人：「個女一歲幾有時都幾孤獨，想為佢添個細佬妹。」