荷里活型男Channing Tatum憑俊朗外貌及一身肌肉迷倒一眾女士，上年更被雜誌選為最性感男士，不過最近忙於拍攝新片《逃學黐孖咇》續集的他，身形竟脹足幾個碼，型男慘變豬肉佬！
近日忙於拍攝新片《逃學黐孖咇》續集《22 Jump Street》的Channing，日前飛往波多黎各開工，仲帶埋老婆Jenna Dewan及半歲大女兒Everly同行，一家三口趁拍攝空檔享受陽光與海灘。
身穿比堅尼的Jenna大騷產後修身成果，反而一向Fit爆的Channing卻身形暴脹，疑增20至30磅，難怪要着背心遮肥肉，冇晒肌肉線條之餘仲凸腩，與肥仔拍檔Jonah Hill有得比，認真嚇人！
現年33歲的Channing出道前曾任職脫衣舞男，上年他更將經歷拍成電影《光豬舞壯士》（Magic Mike），戲中滿身肌肉的他大跳火辣舞蹈，令女粉絲睇到流晒口水，難怪被《People》雜誌選為最性感男士。不過，Channing曾形容自己「內裏係肥仔」，現果然脹爆成豬肉佬，未知會否嚇走粉絲？
文：外娛組