陳嘉上發功 劉亦菲脫胎換骨
陳嘉上（Gordon）去年一口氣拍攝《四大名捕》三部曲，十一個月的拍攝，令他對各演員更加熟悉，尤其女主角劉亦菲，Gordon直言雙方默契十足，有舞蹈底子的劉亦菲，拍打戲得心應手，甚有功架，難怪Gordon大讚對方隨時可以由「玉女」變「打女」！
導演陳嘉上（Gordon）執導電影《四大名捕》系列，第二部曲《四大名捕II》正在上映，挾着第一集內地票房大收，陳嘉上直言「有壓力」：「其實拍續集嘅決定，係第一集上映前幾日，老闆對套戲好有信心，就即刻連住開拍第二、第三集，連住咁拍，一定會有壓力，因為拍一部戲七千萬（人民幣），就算收一億五千萬（人民幣）都要蝕少少，再加上第二集係3D，成本更大，不過今次拍攝，成班台前幕後工作人員都好好感情，雖然過程好辛苦，但大家都放咗好多心機去做，好開心咁完成呢件事。」
於橫店足足拍攝11個月，這段時間相處，Gordon見到片中多位演員鄧超、鄭中基、劉亦菲等的改變，Gordon直言劉亦菲脫胎換骨，拍第二集時比第一集更信任他，二人合作有默契，他指：「有場戲要一Take過十幾分鐘，佢一口氣完成，我好開心見到佢嘅爆發力，一啲都唔玉女；佢拍打戲，亦打得好好，可能有舞蹈底子，加上唔怕捱，我有信心佢可以應付一部純武打電影。」
港票房差失望
雖然第一集內地票房大收，但原來Gordon心裏面有一個結，令他耿耿於懷：「雖然呢套戲嘅第一集內地收得好，但香港票房麻麻，對我嚟講係一種打擊，我係香港導演，想拍電影比香港觀眾睇，但可能呢套戲第一集較少香港演員同埋宣傳唔係咁多，所以第二集我特別加咗張兆輝、周海媚、盧惠光等香港演員，想放番多啲香港元素落去，希望香港觀眾會見到。」
文：影視組