林峯做阿四幫BB推篋
與女友吳千語愛得高調的「Chok王」林峯，早前豪花百萬元豪遊日本兼順道慶祝其34歲生日。日前《東網》直擊兩人前後腳返港，出錢又出力的林峯，除洗乾荷包變「乾峯」外，更阿四上身推行李！難怪被錫到燶的BB可以盡情風騷。
林峯與千語BB日前豪遊九天東京、大阪後回港，當日約下午1點45分，千語BB被《東網》獨家追蹤部隊發現獨自率先步出閘口，雙手零行李的她玩足九天仍精神十足，雖未有回答記者問題，但一提到為男友慶祝生日時，即被甜笑出賣。
相隔約10分鐘，化身阿四的林峯推住三大篋及一大袋戰利品步出，據知今次「峯語」九天日本豪華遊，連來回商務客位、連日頂級酒店、子彈火車、加上在當地使費及戰利品，林峯足足豪使百萬元冧BB。林峯出閘時一面倦容，當記者問他是否很攰時，他起初木無表情地說：「正常啊！」其後聽到問及生日如何與BB度過時，他即笑晒口說：「生日淨係食好食嘅飯。」不過林峯就拒絕透露使費，並笑言「唔一定貴先開心，你哋點玩，我哋就點玩。」
日本歎懷石料理
另外，日前有網友發現林峯在日本的行蹤，並在微博上載他在日本名店MMM遇到「峯語」的照片，相中見林峯獲BB落力揀衫，難怪他返港出閘時表情冧到痹。
至於千語BB，之後出席活動時就表示與林峯在日本大歎懷石料理：「我哋去咗間好難Book嘅餐廳食懷石料理，係我安排嘅，早一個月Book，用咗好多Effort（努力）先Book到。（食咗五位數？）唔係平貴問題，係好好食。」
文：專案組