徐小鳳裙底任捐引阿倫減肥
樂壇前輩徐小鳳（小鳳姐）日前為明年二月十九日開始舉行的六場紅館演唱會到電台宣傳，主持人特別找來多位後輩歌手向小鳳姐發問問題，包括：譚詠麟（阿倫）、李克勤、何韻詩、楊千嬅及倫永亮等，鬼馬的阿倫笑指曾在小鳳姐的經典波波裙底捐出來，當時聞到陣陣藥油味，搞到小鳳姐哈哈大笑。
乳名「徐小毛」
風趣的小鳳姐自爆乳名叫「徐小毛」，又笑言與阿倫同輩，並澄清沒有搽藥油，她說：「我記得你冇喺我裙底捐過喎，哈哈哈，我當然係冇搽油啦。」而李克勤問小鳳姐：「聽講你上台唱歌有個秘訣，行嗰陣唔唱、唱嗰陣唔行，係咪真o架？」氹得小鳳姐大笑回應：「我估我可能係。」
事後小鳳姐坦言不介意遭阿倫捉弄，她說：「佢份人鍾意玩，大家都知，佢係一個開心果，每每有佢出現嘅地方，都會充滿搞笑氣氛。」 主持人提議小鳳姐應找來阿倫捐裙底，她說：「都係一個好提議，但係佢要減肥先，我驚佢捐唔到入去，或者將條裙改到加加大碼。」
文：音樂組