胡杏兒Cool貴時尚
Cut-out元素一直也在時裝中存在，例如在胸口的cut-out剪裁，在60年代時其實已經流行起來。現在多了設計師利用雷射切割手法製造，就像台灣天后蔡依林所穿的裙款，這種設計由去年開始流行，令造型增添不少趣味性。cut-out服裝適合大部分女性，不過時裝作家Janice就建議女士要小心挑選胸口cut-out服裝，很容易顯得過分暴露。
胡杏兒
「高貴性感幾好睇，最欣賞佢個髮型，cool得嚟同條女性化裙好match，反而咁樣先擦出火花，由頭到腳太女人味好容易顯得老土。」
G.E.M.
「感覺好青春甜美，唔係一味kawaii嘅可愛，係小淑女味道。配搭方面好有心思，清雅簡潔造型襯上趣味性頸鏈，效果唔會太保守同斯文，樣樣都啱啱好！」
謝婷婷
「高貴打扮，婷婷着衫一向唔錯，不過每次都係以斯文高貴造型示人，其實佢有potential着得型格。例如唔好將頭髮紮晒上去，髮型好影響整個造型，可以試吓剪流行髮型，可能有驚喜突破。」
蔡依林
「太眼花繚亂！套衫其實幾靚，充滿太空未來感，色彩繽紛上衣撞銀色裙，但粉紅色頭髮出咗事，造型太多焦點，好似聖誕樹咁，反而搞到冇咗焦點。」
熊黛林
「OK，大露背但唔會over，仲好搶眼，係好多女藝人出席活動嘅服裝，好穩陣。加上大紅色本身已經係搶眼顏色，吸引眼球，從事專業模特兒嘅佢亦有身材去展示。」
傅嘉莉
「好似帶咗個『胸』器出街，兩團肉好有壓迫感，已經唔係性感而係暴露；啲cut-out好似bandage咁令人產生SM感覺，令我諗起動漫節啲女模。」
王麗儀Profile
王麗儀（Janice Wong），一位時裝作家及博客（blogger），是16年前華語媒體中首位遠赴歐美時裝周報道的時裝編輯。她經常為香港及海外的時裝設計比賽擔任評判，連美國CNN旗下亞洲生活時尚網站及香港Yahoo也分別讚譽她為「香港首位真正的時裝權威」及「時裝文化人」。