林德信起雙飛 雨僑Jeana讚好
怕醜仔林德信（Alex）在新片中連環床戰雨僑及何佩瑜（Jeana），艷福不淺，他笑言Jeana似美酒，雨僑則有羊肉「騷味」，不知如何選擇！兩女則笑Alex有鬍鬚「好拮」，但感覺不俗。
講述夜蒲眾生相的電影《喜愛夜蒲3》男女關係七國咁亂，片中Alex及雨僑於婚前各自偷食，Alex搭上Jeana，雨僑遂與韓仔李世慜肉搏報復，大膽情慾戲之多，勢令觀眾熱血沸騰！
床戲難過動作戲
Alex連環激戰Jeana及雨僑，他笑言難過拍動作戲：「又要遮住，又要拍得靚有感覺。（同邊個床戰回味啲？）好難答！好似問你鍾意爹哋定媽咪多啲咁。」他笑言與雨僑為「營造」貌合神離感覺，拍床戲前飲了咖啡，雨僑則吃了蒜蓉羊肉，口氣相信有番咁上下，雨僑笑說：「我哋完全冇理對方感受，段床戲我開頭要推開佢，但整整吓又擒咗上去，之後又唔接受佢求婚，好似鬼上身咁，得導演先明！哈哈！」
Alex與Jeana則於早上「空肚拍床戲」，但導演要求兩人飲香檳調情，令Alex只記得Jeana的酒味：「我飲咗兩、三杯，醉醉哋，對白都爭啲唔記得。」至於對Alex的感覺，兩女笑言是「好拮」，Jeana說：「佢好拮……啲鬚，但感覺幾man。」
早知咁激或縮沙
本身是玉女歌手的雨僑破格露肉，更與韓仔的水中激戰，她笑言是愈踩愈深：「如果開頭叫我做，我可能會縮沙，因為DaDa（陳靜）退出，導演想我轉角色，我好快就話好呀！劇本床戲嗰頁係空嘅，點知原來咁激！」Jeana更只穿T-back露背及圓潤Pat Pat，她直言是性感極限：「係我真身上陣，都唔知仲可以露乜，親熱戲都好長，都係極限喇！」
文：立影
攝：劉智源
場地：Beijing Club