梁朝偉目標做港版肥尊

梁朝偉昨日型爆接受電影獎項,演技早已榮升「神枱級」的他竟也有偶像並以尊特拉華達(John Travolta)為目標,希望可以有代表作。而偉仔亦睇淡獎項,對「亞太影帝」持平常心:「唔係只我有付出同識做戲,其他演員都需要鼓勵。」果然有大師風範!

梁朝偉昨日以一身黑色西裝出席「亞洲電影博覽會2013」,並憑電影《一代宗師》獲頒「傑出演員大獎」,作為「神枱級」影帝的他對獎項十分淡然,只以「OK啦」來形容得獎心情,果然是攞慣獎!

問到覺得自己是否傑出時,他說:「呢30年好幸運,遇到好多好好嘅團隊、資源同導演,加上生於香港電影業黃金時代,咁多年嘅培養缺一不可,唔係一個人可以有咁嘅成績。(仲有咩目標?)冇特別,希望繼續拍戲投入角色,依家過咗50歲係另一個階段,想做成熟嘅角色。」

梁朝偉亦希望能效法尊特拉華達:「好想似佢一樣後生時有代表作,中年時又有另一發展,好正。」問到做梁朝偉難定演電影角色較難時,他感慨:「現實世界好複雜,電影世界簡單好多,全部都有個設定。」

再同李康生爭影帝

早前在「金馬獎」上敗給台灣演員李康生的他,二人將在亞太電影展上再度爭影帝,他表示未知會否出席亞太:「依家心態唔一樣,邊個攞獎都冇所謂,唔只我有付出、我識做戲,其他演員都有付出都需要鼓勵,最緊要大家開心。」提到老婆劉嘉玲剛過生日,他表示因老婆當日身在北京而沒有慶祝,他又否認報道指的送上海豪宅作禮物:「但都算係有買禮物,聖誕節都會一齊過,同埋12月都忙住綵排梅艷芳嘅紀念騷。」到時表演唱歌的他笑言好驚:「唔好畀壓力我,等學友安排,又唔係參加歌唱比賽。」

另外,梁朝偉前晚7時半做司機載着兩名男女友人前往中環,三人沿途有講有笑,偉仔明顯心情大靚,拍車後一行人即步往附近餐廳醫肚。

影視組