祖兒挑戰鐵人傷膝慘叫
樂壇天后容祖兒為拍廣告搞到周身傷，不慎雙膝落地即場慘叫，認真唔錫身；另一邊廂，其男友劉浩龍（師兄）前晚與舊愛鄭融錄影時，即場自爆曾背住祖兒「偷食」！
樂壇天后容祖兒早前為拍攝百老滙廣告而化身「全能天后」，挑戰20小時內完成「三項鐵人」－打網球、玩跳水及跳韻律操。講到打網球，祖兒勁興奮話信心十足，她化身「祖兒寶娃」，狂chok甫士在虛擬球場內喪揮球拍，豈料被導演笑指似打乒乓波多過打網球，笑爆全場。
強調要做得更好
玩完網球，祖兒隨即變身做跳水皇后「容晶晶」，貪玩的祖兒在跳板上玩單腳跳再加轉體落地，豈料不慎硬着陸，雙膝落地的祖兒更即場慘叫，嚇到全場工作人員「O晒嘴」，事後祖兒笑言：「我真係冇跳水天分，好在早前冇請纓參加明星跳水節目咋，早知拍之前就搵跳過水嘅阿Sa（蔡卓妍）請教啦。」
另外，祖兒日前接受電台訪問時，提到2003年贏得女歌手金獎一刻，在台上不慎失言說：「今年拎咗呢個獎，下年唔知拎咩獎好喇。」自言「嘴快過腦」的祖兒解釋：「我意思係想知點先可以做得更好。」祖兒又重提2005年在領獎時被噓一事，她說：「聽到噓聲好難受，彷彿大家對我所屬嘅唱片公司有偏見，嗰刻我都想知我哋究竟做錯咗啲咩。」
至於劉浩龍前晚就到無綫錄影節目，被安排與舊愛鄭融埋身玩遊戲，更不避嫌有身體接觸，浩龍又賣口乖話最近陪女友祖兒捱食減肥餐，又自爆有時忍唔住會偷食，他又賣關子話會去睇女友月底的個唱。
文：音樂組