鎮宇無心爭視帝踎地氹仔
吳鎮宇相隔十年回歸拍攝劇集《衝上雲霄Ⅱ》，更憑「Sam哥」一角與同劇飾演「Cool魔」的張智霖齊齊提名今屆視帝。正當呼聲高企的「Cool魔」前晚於電視城落力拉票時，貴為影帝的鎮宇卻唔志在，寧願陪太太及兒子天倫樂，一家到銅鑼灣行街食飯睇燈飾。鎮宇更做其廿四孝父親，不惜踎地為囝囝影靚相。
影帝級的吳鎮宇早前回歸無綫參演《衝Ⅱ》，相隔十年再演「Sam哥」，演技備受激讚，更與同劇「Cool魔」張智霖被網民捧為男神，兩人亦獲提名「萬千星輝頒獎典禮2013」的「最佳男主角」及「最受歡迎電視男角色」。
提早慶生日
不過將於本月廿一日踏入五十二歲的鎮宇，對於視帝獎項滿不志在，縱使大熱的張智霖前晚積極拉票，無心戀戰的他寧願一家三口前往銅鑼灣享家庭樂，實行提早慶祝牛一兼歎聖誕大餐。
鎮宇前晚大約七時許，與太太王麗萍及兒子現身銅鑼灣的時裝店。他們於店內閒逛一會後便分道揚鑣，太太拖着囝囝步行往附近的商業大廈，鎮宇則急急腳前往一間日本餐廳等位。期間見他不時講電話，似乎是告訴太太餐廳位置。未幾母子二人前來會合鎮宇歎日本菜，當鎮宇發現記者拍照時，即友善地向鏡頭笑笑口打招呼。
一家三口於餐廳內等食時，鎮宇還拖着囝囝往商場的玩具店睇玩具，似乎是買定聖誕禮物予兒子。他們吃至晚上九時多才埋單離開，步行往取車時，三人更於商場內的聖誕布置前拍照，極為溫馨。鎮宇還做廿四孝父親，為囝囝充當私人攝影師，見他眾目睽睽之下踎晒地就角度拍攝，活潑的囝囝不停擺甫士，鎮宇放下藝人身段，踎足五分鐘為兒子影靚相。
叫人搵戰衣
鎮宇事後接受電話訪問，他表示已返回內地工作，至於會否出席本月十六日舉行的頒獎禮？他說：「十六號要喺大陸開工，有幾套劇做緊，如果到時拍得晒會出席嘅，我都叫人幫我搵定戰衣。（有冇信心攞視帝？）平常心啦。」對於早前於《TVB馬來西亞星光薈萃頒獎典禮2013》勇奪「最喜愛TVB電視角色」，鎮宇笑說：「係咩？我都唔知有獎添！都開心嘅。」
文、攝：追蹤組