徐子淇暈30秒靠糖保命
千億新抱徐子淇原來在人多翳焗的地方就會見頭暈，又試過在台上暈倒要丈夫抱起。她一度以為自己患有怪病去看醫生，而醫生向她解釋這是Panic attack。不時暈倒的她自言暈倒後30秒就會自己起來，連丈夫都已見怪不怪。
徐子淇早前出席活動時感到眩暈不適，險些暈倒，亦因此惹來第四度懷孕的揣測。前晚她出席活動時被問到身體情況怎樣，她說：「其實識我嘅朋友都知我成日暈，唔係咩大件事，嗰日無暈落地已經ok，嗰日我眼前黑一黑，知道要暈，無理由暈喺你哋面前，咪入房休息，飲啲水。（點解會咁？）見到你哋緊張囉，真o架，醫生話係Panic attack，喺好多人好焗嘅地方，我就會抖唔到氣，一抖唔到氣就緊張，就會暈。（有無驗過咩事？）有驗過，但唔知點解咁易暈，都唔使點食藥，補充番啲水分同糖分，食啲嘢就ok，通常暈完30秒我就會起番身無事。我有睇醫生，開頭都以為自己有咩怪病。」
險出醜領導人前
而子淇試過最嚴重的一次是暈倒在台上，幸好當時她老公李家誠在她身邊可以照顧她，她說：「試過有次有個好大嘅儀式，有好多人，仲有領導人，我喺台上好焗，好想暈，但又想撐住，等到領導人一走我就暈喺台上，啲人即刻好緊張咁同我老公講，我老公話『係呀？』啲人唔知以為佢好冷淡，其實係佢已經見慣，知道我30秒後就會起番身，佢當時抱起我，拖住我入後台，畀水我飲。其實都無咩嘢，係有時會尷尬啲。」
問有無隨身帶備啲糖？子淇說︰「有，手袋有糖同朱古力，我啲細路見我暈就會畀佢哋自己啲糖我。（老公有無叫你唔好去人多嘅地方？）我好少去好多人嘅場合，除非好需要去。」
文：名人組