甄子丹包埋武指 3千萬合理價！

早前內地央視有節目炮轟一線明星片酬過高拉低製作，更點名直指片酬達6千萬人民幣的李連杰及3千萬人民幣的甄子丹。子丹對此表示電影乃自由市場，他所收的片酬更包括武術指導的酬金：「我拍戲好多時會兼任武術導演，所以我拍一部戲嘅日數會比一般演員多！亦唔認同演員片酬高會令製作質素下降，好似荷里活電影咁，荷里活演員酬金一定唔會少，但電影依然有質素。」

李連杰：過億很正常

昨晚子丹與老婆汪詩詩出席Jaeger-LeCoultre活動時強調自己是合理價，他說：「若果劇本好自己唔收錢都可以，個個叫我拍都會叫我收平啲，我問番佢唔賺錢得唔得？（拍許鞍華啲戲呢？）感情戲可能仲辛苦！（3千萬片酬？）有啲多過有啲少過。（擔心被指大口氣？）3千萬又唔係我講，我話3千蚊你又唔寫！自由市場大家一買一賣大家開心，冇理由你食完嘢又叫貴！值唔值呢個價由觀眾去評而唔係我。」他又稱太太負責計算他斷了多少條肋骨，並說：「啲人只睇好方面，其實背後付出好多，好辛苦。」

李連杰日前接受內地訪問時自認不止6千萬片酬：「太低了，我2000年的時候片酬已達1千萬美元！我認為中國電影演員片酬在1億至5億元之間是很正常。」他不認同演員片酬高會拖垮製作：「如製作公司擔心演員片酬過高導致成本不足，可進行票房分紅，從而分擔投資風險。」

成龍試過不收分文

另外，成龍早前出席內地活動時亦稱：「我不認為我的片酬高，我有時甚至零片酬拍戲，例如《十二生肖》，我沒拿片酬，但票房是幾個億。」身兼演員、監製的杜汶澤則笑言高片酬對他來說是很遙遠的事，自嘲是香港最平演員。站在監製角度，他覺得導演永遠會投訴「唔夠錢用」，若沒演員根本拍不成電影，演員有價值才會有老闆願意投資。

文：影視組