鍾嘉欣lucky12 封后露玄機

無綫藝人徐子珊、鍾嘉欣、胡杏兒、岑麗香、高海寧、田蕊妮、梁烈唯、陳展鵬等逾二千台前幕後工作人員昨晚出席無綫盆菜聯歡晚宴。「萬千星輝頒獎禮2013」將於下周一（16日）舉行，視帝視后之爭空前激烈，昨晚無綫筵開二百圍，人齊加上多位無綫高層也有出席，是候選帝后最佳拉票的時機，惟去年「嗌喇叭」戴綵帶拉票的子珊，明顯比上年低調，沒有甚麼出位拉票伎倆，大熱嘉欣又因開工遲到，只得田蕊妮較多人邀拍照，蕭正楠派花生糖拉票已是最積極。

笑言攞勤工獎

子珊指今年因忙拍劇冇時間，再加上上年是fans幫她搞「喇叭」，故昨晚比上年低調，問她是不是棄戰？子珊說：「平常心，上次有得攞（最受歡迎電視女角色），今年攞唔到，下年都有得食盆菜宴。（攞勤工獎？）有，我就應該攞，今晚嚟輕鬆下！（視后獎想留畀邊個呀？）唔好話留，個個都有實力，係支持，我睇好鍾嘉欣同田蕊妮，視帝心水就係黃子華，我留番下年繼續努力。」

江美儀（左二）、唐詩詠（右二）落力拉票，梁烈唯（左）與黃浩然（右）則輕鬆得多。

無綫搞盆菜宴，一眾藝人食得開心。

「好似有啲嘢」

同場的嘉欣對子珊「放軟手腳」發表棄戰論，並力撐她，嘉欣說：「好多嘢都估唔到，唔知大家嘅想法，唔好氣餒，我對攞獎平常心，不過，今年確係好似有啲嘢，12號係我當年選港姐嘅號碼，所以12係我一直以嚟嘅幸運號碼，咁啱我嘅視后候選號碼係12號，頒獎禮又係喺12月搞。」

徐子珊與阿田friend到玩自拍。

徐子珊今年放軟手腳不奢望奪視后獎，反而睇好鍾嘉欣及田蕊妮。

田蕊妮感謝子珊睇好，並說：「好多同事睇好我，令我有番啲自信心。（點解唔似子珊上年咁攞喇叭拉票？）咁我要問佢借喇叭先得，或者我上台高歌一曲，獎項冇所謂，最緊要大家高興。」

文：影視組