陳奕迅美加騷狂迷突圍熊抱
歌手陳奕迅（Eason）日前完成美加站的巡迴演唱會，在多倫多、聖荷西及溫哥華等地吸引超過3萬「迅徒」朝聖，在多倫多站上，雖然當晚只有零下13度，又落住大雪，但仍不減歌迷的熱情，一早就在場外排隊等入場，在個唱中段，全場「迅徒」拎起手機，開住白光製造「飄雪」效果，甚為感動的Eason驚嘆：「好似提早度過一個白色聖誕！」
攬攬回敬
另外，原來Eason是首位在聖荷西連續舉行兩場大型個唱的華人歌手，門票一開售就即被秒殺，即使「添食」加開一場，門票依然供不應求，難怪Eason如此得戚。在個唱期間，有位「長毛」男歌迷突然衝破保安防線，隻身衝上台攬實Eason，雖然Eason識做地抱抱回敬，但他就抵死話：「點解唔係女仔嚟o架！」場面爆笑。
自封榜樣
至於Eason在溫哥華站上就發揮「吹神」本色，分別以普通話、廣東話同英語與歌迷吹水，笑言講到「食帶」的他又鬼馬話：「雖然喺外國，但中文都好重要，因為我哋都係中國人，好似我咁，唔止有流利廣東話，仲有標準嘅普通話同英語，大家要以我為榜樣，同埋你讀完書後記得要賺晒老外啲錢，同埋溝晒啲鬼仔鬼妹呀，知冇？」
文：音樂組