梨園名伶嘆失國寶
紅線女逝世，一眾粵劇名伶、圈中好友深感惋惜，他們都讚揚女姐對粵劇界的貢獻，又指她愛提攜後輩，是非常友善的大師級前輩。
【梨園中人】
蓋鳴暉：「女姐為人隨和，係個快樂、活潑嘅老人家！佢喺戲行地位舉足輕重，貢獻良多，作為晚輩要爭氣，要將佢嘅藝術貢獻薪火相傳。」
阮兆輝：「佢係大師級，佢嘅精神、風範，值得學習之處好多，佢好有成就！」
龍貫天：「佢係國寶級演員，喺內地做好多提拔後輩嘅工作，早兩年我返內地演出，佢同我傾咗好多偈，令我獲益良多。」
吳仟峰：「作為後輩，佢有提點我同畀意見我，佢係粵劇界好有代表性嘅花旦，女腔充滿代表性！」
新劍郎：「一顆巨星隕落！佢所創嘅女腔及首本名曲《昭君出塞》一定會流傳。」
【圈中藝人】
謝賢：「佢都88歲嘞，好安詳、有福。我同佢合作過一部《胭脂虎》，當時我剛出道，佢好肯教新人。基本上我同佢唔多聯絡，對上一次見佢都幾年前，我喺香港同佢食飯，佢仲叫我返內地發展可以搵佢。」
胡楓：「哎呀！我唔知女姐過身，好突然、好可惜！佢係好偉大嘅藝人。我哋從未合作，佢仲同我講：『胡楓，我哋冇機會合作！』五、六十年前我合約就嚟滿恢復自由身，就快可以合作，點知兩星期後，佢就返咗內地。」
李香琴：「唔知佢過身，咁陰功！（有冇合作過？）冇，當年我都未做花旦，佢好好嘢o架……好可惜！」