家輝愛的宣言衝動攬青雲

張家輝與劉青雲相交多年，卻到最近寰宇新片《掃毒》才真正結片緣，家輝坦言今次合作令他對青雲改觀：「以前我覺得佢了解秋生同鎮宇多啲，而家我發現一個眼神取代千言萬語，佢已經知我諗緊乜。」受訪期間，家輝摸着青雲大腿「sweet爆」表示：「有時唔係冇見好耐，我都有個衝動想攬住佢，同佢講我有幾愛佢。（唔痺？）唔o架，我鍾意直接表達。」青雲於片中被導演陳木勝安排跳海，相當慘情：「佢問我有冇喺屋企附近泳池游過水，我話有，去到現場佢就叫我跳落去。（好危險？）危險係因為水淺囉，深啲反而冇問題。」