馬詩慧慳家名模

多年前已被譽為香港十大名模的馬詩慧（Janet），年輕時因工作關係周遊列國，穿盡各大時尚品牌的最新時裝，可謂要幾風光有幾風光。但自從Janet與型男王敏德（Michael）結婚，並誕下三名子女後，她已淡出娛樂圈，專心相夫教子，只閒時出席公開活動，過過明星癮。而近年我們看到有關Janet的報道，大多都是拍到她平日乘坐港鐵或小巴等公共交通工具，生活非常平民化兼且慳家，完全沒有巨星的光環。

誕女兒改掉奢侈

Janet亦承認自己曾有非常揮霍、盲目追求名牌的時光。「我喺初出道嗰三、四年，一開季就會即刻shopping，每季最少都用十幾萬嚟買嘢，有陣時啲衫都未着過，佢就減價，真係好揼心。不過其實我都唔算係完全追求名牌，只不過係我佔有欲好強，好想擁有。」Janet坦言這種奢侈生活一直維持到她生了第一個女兒王曼喜後，才突然有所改變。她笑言：「真係講都唔信，當我喺醫院生完小朋友，清醒咗。第一件事就係打畀我賣保險嘅朋友，我同佢講『你即刻嚟搵我』。其實佢一直都有叫我買，不過我以前成日覺得呢啲嘢呃人，所以一直都唔買。但係當BB一出世，我做嘅第一件事，就係幫自己同小朋友買保險。成件事真係好突然，可能呢個就係做母親嘅本能。」

Janet不時一家五口出席公開活動，非常溫馨。

Janet只慳自己，不會管老公的興趣。

老公生活質素好

相反，Michael的生活卻明顯揮霍得多，眾所周知他的嗜好是駕駛直升機，這興趣卻是燒銀紙的玩意。問到Janet可曾叫他把錢節省下來，好好理財或投資？Janet笑言：「我係佢老婆，唔係佢管家。佢搞得掂自己就得。加上啲錢係佢自己搵嘅，我好難叫佢搵啲平啲嘅嗜好。佢有自己嘅自由，唔係心甘情願嘅就逼唔嚟。」通情達理的Janet更從另一個角度出發，欣賞Michael對自己興趣的執着，更大讚他的生活質素很好。「佢個人要求好高，佢每一樣嗜好都做到好專業，就算佢打保齡，佢都會買齊全套幾千蚊嘅工具、手套咁。」

Michael愛駕駛直升機，是高消費玩意。

Janet是香港十大名模之一，舉手投足有壓場魅力。

一件衫三母女着

其實一直以來，三名子女的學費均由Michael負責，完全不用Janet操心。但Janet仍把自己的開支減到最低，一切以家庭為首位。加上她出席公開活動亦有服裝贊助，故花於置裝上的開支已減到很少。她更笑言：「不過我依家買衫好抵，可以三個人着，因為兩個女同我嘅size係一樣。我多數都會買型少少、casual得嚟又舒服嘅衫，好多款都啱佢哋着，佢哋成日都喺我衣櫃度搵衫着o架。」她們三母女閒時亦愛一起shopping，互相交流扮靚心得。Janet笑言大女曼喜對時裝較有興趣，相反二女麗嘉卻偏好富民族色彩或消閒運動服，唯一要求是穿得舒適。

問到有否打算讓兩個擁有模特兒身材的囡囡加入娛樂圈或做模特兒？她表示：「我未聽過佢哋有呢個諗法，我自己都冇諗過，不過我知Michael唔鍾意。依家唔係父母話事，最重要係佢哋自己鍾意。」Janet笑言細仔躍穎於三姊弟中最有表演欲，喜歡唱歌、跳舞，若他將來希望入行，她亦會抱開放態度，讓他向自己的興趣發展。

慨嘆冇新一代名模

作為上一代名模，Janet亦慨嘆如今香港已沒有新一代名模冒起。但她卻認為不是香港模特兒的質素下降，只是近年各大品牌都把投資注入內地，導致香港減少了大型的品牌時裝騷。她說：「內地咁大，咩類型嘅模特兒都有，都唔使特登請香港模特兒上去行騷。冇咗市場需求，自然就冇新嘅名模冒起。」

採訪：龔凱欣

攝影：吳文聰

化妝：Kitson @ portfolio

髮型：Ken Hui @ ii hair & nail

服裝：Moiselle