黃智雯 朱晨麗 舞性大發
黃智雯與朱晨麗同於演藝學院畢業，兩人亦同是跳舞科班出身。回憶演藝學院的幾年學生生涯，智雯認為內部鬥爭好比劇集般精彩，久而久之對跳舞的激情也大大減退，反而以拔尖身份插班的阿朱，因年紀最細成為班中被呵護對象，後來還順理成章當上專業舞蹈員，惟最後卻選擇了當演員。雖然如此，但兩女均無悔當初，對於跳舞的鍾愛度還存在，並同聲表示會於工作以外的時間找跳舞老師上堂，實行繼續舞．出．色！
拍劇擦出火花
朱：之前同你合作拍電視劇《情逆三世緣》，大家都係演跳舞嘅女仔，我個角色仲要係一心為賺錢，成日都做啲唔應該做嘅嘢。
黃：我個角色畀人感覺係奸角，其實係一個悲劇人物，成世都係諗報仇，因為要投入情緒，所以拍嗰時都唔係咁開心。
感覺重返學校
朱：不過，今次可以畀我哋跳番舞，寓工作於娛樂。大家都咁鍾意跳舞，仲試到幾種唔同類型嘅舞蹈，有中國舞、士的舞、又有歌舞劇舞蹈，真係好過癮。
黃：記得有一段係我同你solo，我跳卡門，你就跳芭蕾，加埋好多超現實嘢，令我諗番以前讀演藝嗰時乜都要跳，好似做音樂劇要扮老外，喺呢套劇就用到，但如果叫我好似你咁叻，咁就真係唔得，所以跳芭蕾交畀你。
朱：我始終都係跳開芭蕾嘛！士的舞我就冇接觸過，眼神原來係要妖啲，嗰排都要喺屋企對住鏡嚟模仿。
黃：大家仲要認真到搵排舞師排舞，拍嗰時好享受，雖然一個鏡頭要跳好多個鐘，仲要夾埋其他女仔，但就有少少感覺好似返去以前演藝咁，你又一齊跳，所以拍呢啲片種特別開心。
讀書有苦有樂
朱：你畢業咁耐有冇諗過真係跳番舞？
黃：我都有定時去上堂，為興趣之餘都要郁吓，舊年去過紐約學跳舞，但一開劇就好難就時間去，依家拍完又想跳番，其實我哋係同一個老師嘅，哈哈！
朱：係喎！不過我哋冇試過一齊上堂，大家都夾唔啱時間，下次一齊去啦！呢啲係去玩吓，同以前真正咁受訓係兩回事，當然依家開心啲啦！
黃：好認同呀，我以前上堂大部分時間都唔係開心，初期梗係好鍾意咁去追求自己理想，到得到之後，日以繼夜練係好辛苦嘅事，入面仲要有鬥爭，一班十幾個人，主角得一個，梗係個個都去爭，咁就容易將興趣變咗鬥爭，慢慢就會激情減退，因為都唔係當初想像中咁，跳舞應該好開心。
希望演音樂劇
朱：我又冇呢個感覺，當年15歲由上海被召入去，好似重點培養咁，成班都係十幾人，好多同學都大我幾年，所以佢哋會好似照顧妹妹咁，好溫暖，唔覺得有人同我鬥，根本冇壓力，成班同學好和諧。
黃：會唔會係假和諧？尤其你係外來者。
朱：冇呀！到依家都係成班同學一齊食飯。
黃：鬥爭唔係出面，當你見得多勁人，入面發現仲有人勁過你，慢慢就會冇咗自信心，但同時間都會令自己更勤力。我依家都有好多同學keep住聯絡，因為係個好回憶。
朱：我2003年入去讀，讀咗4年。
黃：咁你會辛苦啲，我好似2000年入去讀音樂劇，依家都冇咗呢科，但有時諗起都有個情意結喺度，好想做番齣音樂劇或舞台劇。之前有人搵過我，不過啲期就唔到，我心入面仲有團火，想做番本土音樂劇，希望他日有機會。
新舞步有難度
朱：我都好耐冇好專業咁跳，雖然有跳舞底去接觸Jazz Funk、Hip Hop，會較易上手，但感覺完全唔同。
黃：下次同你嚟個Jazz Funk crossover芭蕾。
朱：我幻想唔到你Hip Hop造型。
黃：我都唔得，冇嗰種味道，你叫我跳芭蕾唔得，冇feel。
朱：冇feel真係唔得，要練多啲，根本就跳唔到我哋個老師嗰種型格。
曾經開班授徒
朱：我老咗好想開學校教跳舞，將自己技能傳落去。
黃：以前都有教過中學生同大人跳Jazz Funk，教大人好開心，佢哋會好用心跳，教識佢哋我又好有滿足感，但教中學生，佢哋就冇咁用心，我都係鍾意表演多過教。
朱：係！見到台下觀眾企起身拍手掌會好開心，將排練時嘅辛苦忘記晒，試過教一班3、4歲小朋友，一個喊就會令到其他都跟住喊，好難搞。
黃：仲要唔可以鬧，所以好佩服依家啲老師，要好有耐性。
後記：話題數之不盡
女人只要有共同興趣，絕對可以講足幾粒鐘不停口，黃智雯同朱晨麗就是這樣，她們一講起跳舞，就手舞足蹈，再加上是跟同一個跳舞老師上堂，自然話題多多，訪問期間不斷研究Jazz Funk、Hip Hop還是Jazz較適合自己，更鑽研跳舞動作，最後她們的結論是，樣樣都學齊，認真估唔到！
文：影視組
攝：黎志輝